RCI NOONUAN ONOM VUHAN MONOIZUK MODIIDIKOT

KOTA KINABALU: Huguan Montili Datuk Seri Najib Tun Razak pinopoboos poguhudan i tonudon pongintangan Suruhanjaya Koponoizukan Diraja (RCI) montok monizuk modiidikot aiso kasagaan om ginumu modiidikot songkosuvazan i noonuan kad kointutunan obulou toi ko koponompogunan id Sabah.

Minoboos isido, RCI buanon di Tan Sri Datuk Amar Steve Shim Lip Kiong, bagas Hakim Tagazo Kuut Takavas id Sabah om Sarawak om ampazton do apat tuhun pesurujaya di suvai.

“Izioho nopo nga Prof Datuk Seri Panglima Dr. Kamaruzaman Hj. Ampon, bagas Naib Canselor Univositi Malaysia Sabah, Tan Sri Herman J.Luping bagas Luyal Tagazo Pogun Sabah, Datuk Henry Chin Poy Wu Kumoduvo Ponikoon Yayasan Panahaban Kahasaan Tavagat Malaysia om bagas Huguan Pulis Kuala Lumpur om Datuk K. Mustafa, bagas Monunuat polinta pogun Sabah,” ka disido.

“Montok Huguan Monunuat Komontilian Pidagangan Suang Pogun, Kopolitif om Kopomogunaan Datuk Saripuddin Kassim vagu nopihi sabaagi monunuat suruhanjaya diti.

DYMM Seri Paduka Baginda Yang Dipertuan Agong nakaakun no miampai atag polinta Hongkod montok monuidong iso Suruhanjaya Koponoizukan id siibo Akta Suruhanjaya Koponoizukan 1950 montok monoizuk koikatan modiidikot aiso kasagaan id Sabah,” ka disido.

Minoboos isido dino kuminaa magaganu abal kahapas pisamaanan miampai buuan Umno Pogun om buuan ngavi komponen BN Sabah id Louting Umno, id doiti, di koniab.

Nokotindapou nogi Vozoon Montili Datuk Seri Musa Haji Aman om saviavi huguan parti Komponen BN izioho nopo nga Tan Sri Joseph Pairin Kitingan (Polosiden Parti Bersatu Sabah), Tan Sri Bernard Dompok (Polosiden Upko), Tan Sri Joseph Kurup (Polosiden PBRS), Datuk VK Liew om buuan ngavi Umno.

Minoboos i Najib, lahan kopongintangan suruhanjaya koponoizukan dino kiangkab monoizuk nung kapanaakan kad kointutunan obulou toi ko koponompogunan kumaa modiidikot aiso kasagaan id Sabah nopo nga katanud sakadai undang-undang om monoizuk nung modiidikot aiso kasagaan id Sabah mongingit kad kointutunan obulou, lisit kointutunan naamot (obulou) toi ko koponompogunan id lahan au tumanud do undang-undang i pinolijisto id suang kopolijistahan mongundi.

“Ino nga monoizuk nung modiidikot aiso kasagaan id Sabah i mongingit kad kointutunan obulou, lisit kointutunan naamot (obulou) toi ko koponompogunan id lahan au tumanud do undang-undang di pinolijisto id suang kopolijsitahan mongundi.

“Suvai mantad dino Suruhanjaya dino monoizuk nung boogizan kikuasa dino i minaganu nuununu haang toi ko minonoodo do nuununu kopongumbosian kumaa kootulan koubasanan standard, kalalahano om kootulan ngavi montok modihin nuununu di au poinguhud mantad boogizan undang-undang.

“Montok monoizuk miampai hobi poingonop kokomoi kootulan koubasanan standard, kalalahano ngavi om kootulan ngavi kokomoi miampai kapanaakan kad kointutunan obulou toi ko koponompogunan kumaa modiidikot aiso kasagaan id Sabah miampai maganu pongintangan standard om norma sompomogunan di noguno montok Malaysia, montok monuu nuununu kopoundohian monotk papantod kootulan koubasanan standard, kalalahano om kootulan ngavi dino,” ka disido.

Minoboos i Huguan Montili, Suruhanjaya Koponoizukan dino nga monoizuk saasabap kinoinsavatan ginumu id Sabah tumanud kategori dioho ino nopo nga tuhun Sabah i mogiigizon pointatap id Sabah, kaampai no dioho i noonuan kad kointutunan obulou om momogun mazaa sijil kinosusuvon (kopolijistahan ahaid). Pakalaja dahabus (kaampai no puu paganakan), modiidikot aiso kasagaan (kaampai no puu paganakan) om nouzazang miampai monoizuk tanda dino kumaa ginumu di nokolijisto id suang kopolijistahan mongungundi.

“Montok monoizuk tanda sosial kumaa mogiigizon id opgun diti i kopigompit mantad kinapataakan kad kointutunan obulou toi ko koponompogunan kumaa modiidikot songkosuvazan id Sabah om monoizuk ginumu modiidikot songkosuvazan id Sabah i noonuan kad kointutunan obulou toi ko momogun miampai maganu pongintangan kointutunan dioho sabaagi tuhun di aiso koponompogunan,” ka disido.

Minoboos isido, suruhanjaya dino mositi monguhan koponoizukan dino id suang timpu onom vuhan mantad tadau kinopomihian pinahabus om luputan dino pataakon kumaa Yang di-Pertua Agong.

“Ponuidangan Suruhanjaya Koponoizukan diti popokito tanda pilotian takavas Polinta Pogun montok monoizuk ahal ngavi di pinogompit kokomoi modiidikot aiso kasagaan id Sabah.

“Humansan polinta mooi do momoguno Sabah kaanu kovosian mantad ponuidangan Suruhanjaya Koponoizukan diti om misokodung monokodung polinta id suang mogium poguhudan om koinsamakan tavasi montok monguhan kobohingkangan di kogompit,” ka disido.

Minoboos i Najib, kobohingkangan modiidikot aiso kasagaan id Sabah ahaid no pinogompit do buuan om layat Sabah mantad dino sabaagi do koponguhanan timpu tanau, layat Sabah om saviavi parti komponen Barisan Nasional (BN) id pogun diti pinopoiho do noikot nodii timpu dioho iso Suruhanjaya Koponoizukan tuidongon.

“Mantad dino polinta monoimo angkab layat Sabah dinio i pinohombus mazaa BN Sabah om nakaakun monuidong RCI montok monoizuk ahal diti om mangatag haang di mositi onuon,” ka disido.