APMM MANGATAG POPOTINDOOI KAPAL ID SABAH

TAWAU: Agensi Mongunguasa Maritim Malaysia (APMM) mangatag popotindooi kapal dioho id Sabah montok popoinsavat vagu tangangazan dino id suang mintamong koumohigan pitakasan pogun mantad nuununu boogizan kopogohimuvan.

Kumoduvo Huguan Potunud Kalaja APMM, Datuk Ahmad Puzi Ab Kahar minoboos atag dino adadi otuhuk songian agensi i tinuidong tuu toun nakatahbi dino kivaa hongkod tavan sondii id pogun Sabah mikot.

“Pointantu no do kivaa abaabazan popotindooi kapal id Sabah songian polinta kaanu popotounda sakadai. Moguhud tokou montok monoodo hongkod id Kota Kinabalu om hongkod tavan id Sandakan. Nung kaanu sakadai tana mantad polinta Sabah, todoon tokou tosisikap dati,” ka disido.

Minoboos i Ahmad Puzi dino kuminaa magaganu abal ontok minonoodo kotombuhuzan kalaja kuminaa Uvang Maritim 18 id doiti di koniab.

Poguhui dino, Ahmad Puzi nokoikot id Tawau mantad Kota Kinabalu minomoguno do kapal do APMM kavo CL415 Bombardier miampai tuminubpo id savat vaig id Teluk Cowie kahapas minonoodo kotombuhuzan tavan id piipio uvang pitakasan id Sabah.

Kapal dino nokoikot id Kota Kinabalu songkoniab mantad Subang om poompus podtuhudan dino mantad doiho, Ahmad Puzi nga minonoodo kotombuhuzan tavan id uvang pivohitan pitakasan pgun kaampai no id uvang hongkod tumau om Pulau Layang0Layang.

Tumanud di Ahmad Puzi miampai kivaa hongkod tavan miampai potindaazan kapal dino id Sabah, kalaja monombuhui om panamangan tavan do agensi dino id uvang pitakasan Sabah aanu monoodo do saasau miampai avasi tangangazan.

“Nung iti (potindaazan kapal) aanu monuhuk, pointantu no do pitakasan id Sabah diti tomoimo hobi atampasi om atamangan om ikonomi Sabah, hoohobi no kozo i kogompit miampai maritim hobi koinsavat. Pointantu no pomounan tumau pogun obobo kobuuon om kapanakadai kumaa ikonomi om kotundaan pogun,” ka disido.

Kokomoi koozuzuvo koumohigan pitakasan id Sabah ontok timpu diti, minoboos i Ahmad Puzi ino id suang koozuzuvo atampas miampai atamangan om APMM mangatag monuidong pos doguvang dino id poompus pitakasan Sabah miaga do Kudat om Lahad Datu. Pos miaga dino notuidong no id Semporna.

Ka disido koozuzuvo koumohigan dino nopo nga asil mantad pisokodungan togiot piahatan mogisusuvai agensi mogunguasa miaga do Susumangod Daat Diraja Malaysia, Tinimungan Pulis Marin, Kastam om Imigresen id suang mintamong uvang pitakasan dino.

Kokomoi kopotindaazan aset APMM, minoboos i Ahmad Puzi Sabah onuan do aget tagazo piagahon pogun suvai ino nopo nga 24 kapal, au kaampai 23 asei suvai miaga do padau om padau toidau.