SAKADAI RM287 LIZONG KUMAA POMOPIAN USIN POGUN 2014

PUTRAJAYA: Datuk Seri Najib Tun Razak minoboos Polinta Hongkod popotounda sakadai RM287 lizong kumaa Tinimungan Pomopian Usin Pogun ontok toun 2014 montok mambalai pinoobu Kapanaakan kumaa Pogun ngavi di Nokotoguvang Kokuangan Usin Id Suang Akaun Monoina kiginumu RM30 lizong.

Huguan Montili minoboos kapanaakan dino nogi tumanud kumaa kinavas kotundaan ikonomi, infrastruktur om sinuau koposizon RM257 lizong.

Isido, i nogi Montili Kousinan, minoboos dino id suang iso pitimbungakan media kahapas minomuuan Mitingan Kounsol Kousinan Pogun id hinimput mitingan kopoguhu Komontilian Kousinan id doiti.

Ka disido onom kalatas kalaja pibaasan id suang mitingan di koniab i moboos kokomoi kopotutan miampai polinta hongkod om pogun, miampai ahal ngavi i popoompit poguhudan kousinan polinta pogun om ahal ngavi di kogompit.

Minoboos i Najib Kounsol Kousinan Pogun nga maganu kopoihaan Luputan Audit kumaa Tinimungan Kousinan Amanah Koponoinaan Talun alun Pogun om Sistom Kopoihaan Luputan Talun alun (MARRIS) i pinapanau Komontilian Kousinan id saviavi pogun, i vookon mongintutun kozo piipio ahal i mositi potunudon om uangan vinasi montok koumohigan om kouhanan momoguno.

“I kiguno nopo nga pongunsuban di pataakon id suang mitingan diti mooi usin di pinotounda polinta hongkod dino tootopot gunoon poimponu dino montok angkab koponoinaan talun alun,” ka disido.

“Montok 2011 ginumu kapanaakan di pohuzungon nopo nga RM2,591 lizong piagahon RM1,087.5 lizong ontok 2006, ino nopo nga koinsavatan 138 piatus toi ko id posoihi kouangan id kinvas 27.6 piatus sontoun,” ka disido.

Saasabap no do kivaa polinta pogun noihaan do au momoguno poimponu sakadai di pinotounda, minoboos isido iso makmal papanaon Vuhan Koopod diti montok monoodo gais pongihaan di hobi pointantu kokomoi kalalahano poguhudan miampai pomogunaan kapanaakan koponoinaan pogun om saviavi polinta pogun nakaakun montok mumpazat dino.

Tumanud disido, iti saasabap no do layat humansan talun alun pogun toinaon miampai tavavasi, om polinta pogun kaanu monuhung mazaa lahan diti, nga di kiguno nopo kozo nga montok mongintong do sakadai dino gunoon montok komozon dino do tinuidong.

Minoboos i Najib mitingan nga pinoiho do ningkokoton noohos polinta pogun kumaa polinta hongkod nokotuun RM1.6 bilion toi ko 8.4 piatus, ino nopo nga mantad RM19.1 bilion ontok 2010 piagahon RM17.5 bilion ontok 2011.

Minoboos isido ginumu kabalai mahik noohos do polinta pogun nga nouangan vinasi ino nopo nga RM790.6 lizong ontok toun 2011, piagahon RM434.1 lizong ontok 2010.

Vookon ginumu kinokuangan diti nopo nga saasabap no do pinogonuan noohos do Poguhudan Aset Air Berhad (PAAB), id nombo gisom baino PAAB minaganu noohos projik kaganapan vaig montok himo pogun di kiginumu RM3,496.3 lizong,” ka disido.

Poguntaban dino nopo nga Pulau Pinang RM655.2 lizong, Perlis (RM75.1 lizong), Negeri Sembilan (RM1,128 lizong), Melaka (RM764.2 lizong) om Johor (RM873.7 lizong).

Huguan Montili tuutulus dino minoboos Kounsol Mitingan misusuvab koniab nga minanaak bobooson kokomoi kobuuon ikonomi babaino, miampai unjuran montok toun mikot, suvai ko kohobusan kokomoi kotombuhuzan ikonomi sompomogunan.

Naamot dino, ontok minonimba iso pogudizaan nung kokomoi defisit pogun nga pinogompit id suang mitingan, minangakun i Najib ahal dino om minoboos “ponguangan defisit polinta hongkod id lahan nga saviavi poguntaban dino pohobuson id suang Belanjawan.”

Mongintong kumaa makmal i ozuvon ontok Vuhan Koopod diti vagu, Huguan Montili minoboos, ino nga mongintutun kozo kokomoi nookuo vookon pogun au momoguno poimponu sakadai di pinotounda tumanud kalalahano dino, om kotontuan makmal dino pobosoon kumaa tuhun ginumuan au nodii ahaid.