JTK POPOTIMPUUN GAJI TOSIIBO PAKALAJA SWATA

KOTA KINABALU: Koupisan Vinakas Kalaja (JTK) Sabah papanau ponguasaan kumaa Kapanadaan Gaji Takavas Boogizan Misosondi ontok nopo Koimagon Ponuuan Kapanadaan Gaji Tosiibo pohobuson do Komontilian Sandad Vinakas Tuhun, ka di Panakadai Montili Kotundaan Sandad om Kobuuon Teknologi Kopoihaan Datuk Jainab Ahmad.

Minoboos isido, montok mongintong saviavi tampat pakalajaan id pogun diti tumanud kopotontuan gaji tosiibo, piipio bobooson pinataak kumaa boogizan ngavi dino.

“Bobooson Kapanadaan Gaji Tosiibo Kabangsaan tinaak kumaa upisol om pakalaja JTK Sabah miampai huguan ngavi koupisan om agensi id siibo Komontilian Sandad Vinakas Tuhun om kumaa tampat pakalajaan koisaan pakalajaan, koisaan ngavi pakalajaan, koisaan pakalaja om sinompuuan pakalaja Sabah,” ka disido.

Minoboos isido dino ontok minonimba tudizo Puu Dewan Koundangn Pogun Luyang Melanie Chia Chui Ket, id sesi pisimbaan ontok pitimbungakan dewan koundangan pogun, id doiti, di koniab.

Minoboos i Jainab, gaji tosiibo popoompit pakalajaan id suang ikonomi id pototongkop pogun, au kaampai kotoinaan suang pogun ino nopo nga pakalaja id daamin, momutanom.

“Gaji tosiibo montok Semenanjung Malaysia pinatantu id kinavas RM900 sombuhan toi ko RM4.33 sanjaam, naamot montok Sabah om Sarawak om Tana Pisompuuvan Labuan kiginumu RM800 sombuhan toi ko RM3.85 sanjaam,” ka disido.

Ka vagu disido, popotounda polinta kalalahano kapanadaan mooi gaji tosiibo di pinatantu au kobohingkang tampat pakalajaan om au kolugi do pakalaja miampai papasaga vookon elaun toi ko balazan tuutulus nga id suang poguntaan gaji tosiibo.

“Tadau kopomoiganan kapanadaan gaji tosiibo dino nopo nga onom vuhan mantad tadau ponuuan gaji tosiibo, sundung i do ingkaa montok manaak hivang om kosivatan kumaa tampat pakalajaan monoodo kotoundaan poimponu dino mooi pongindopuan dioho au kopogompit, timpu kotimpuunan montok kategori diti ino nopo nga 12 vuhan mantad tadau ponuuan gaji tosiibo pinoimagon,” ka disido.

Naamot dino ontok minonimba tudizo Adun Membakut Datuk Arifin Mohd Arif, i minudizo onu abaabazan timpu dumonto pionitan pisokodungan id suang boogizan pilotian piahatan Sabah om Brunei hoohobi no kozo id suang konteks BIMP-EAGA, minoboos i Jainab ino kaanu nodii boogizan misosondi id duuduvo kinoizonon momoguno vinakas om tangangazan dioho suvai ko momoguno sandad id lahan pointantu.

“Polinta pogun minonoodo pidondian pilotian miampai Brunei Darussalam ontok 10 Vuhan Kotuu nakatahib id suang boogizan teknologi kopoihaan om pilotian. Ino kiangkab mongunsub pisokodungan om kotundaan ICT id piahatan duuduvo boogizan.

“Kapanadaan pilotian dino nogi kaanu monuhung kapanadaan BIMP-EAGA Rink ino nopo nga projik popituubung kinoizonon BIMP-EAGA mantad po toi mazaa gentian optic stelit toi ko microwave,” ka disido.