Pomogunaan Teknologi GENKiMO aanu popobuu id Sabah: Yahya

KOTA KINABALU: Kumoduvo Vozoon Montili Datuk Seri Panglima Yahya Hussin mokianu pomogunaan Teknologi GENKiMo aanu popobuu id Sabah montok momogompi sandad posoihi suvai ko monuhung tinimungan ikoton popoinsavat produktiviti pomutanaman.

Isido i nogi Montili Pomutanaman om Pomounan Taakanon otumbazaan, mazaa teknologi dino kobohingkangan ovutong mantad abaabazan pomutazaman aanu monguang miampai kaanu popoinsavat hinuub om produktiviti pomutanaman.

“Datuk Seri Najib Tun Razak, Huguan Montili Malaysia sondii pinopoiho haid do boogizan pomutanaman nopo nga boogizan di nadadi sandad kiguno montok tangangazan layat om kobuuon ikonomi pogun.

“Saasabap no dino, kosimbanan mantad nazatan kohobusan gisom kumaa kapadagangan asil pomutanaman mositi todoon. Otumbazaan zou miampai kivaa sokodung layat miampai pilotian polinta, kosimbanan boogizan pomutanaman aanu papahantoi,” ka disido.

Minoboos isido dino ontok pinopoimagon Seminar Teknologi Genkimo om Pokikitanan Pomogunaan Genkimo nazatan Mardi Pogun Sabah id Upis MARDI Pogun, id doiti, di koniab.

Nokotindapou nogi Panakadai Montili Pomutanaman om Pomounan Taakanon Sabah, Datuk Bobbey Ah Fang Suan om Datuk Haji Musbah Haji Jamil, Monunuat Pulitik Yahya, Mahlan Zinin om Victor Ng, Potunud Mardi Pogun, Jamaluddin Jaya.

Minoboos i Yahya, pomogunaan GENKiMO toi ko id lahan poimbida dino GENKiMO-Fauna id kabalai kiginumu do RM7.23 per tan nakahantoi pinapahabu asil (iso kavo taakanon tazam id suang boogizan poinzopos) taakanon tazam di hobi kikualiti mantad boogizan votik, vongi om vinasi dino.

“Ino nogi koponibo timpu koponukahan mantad sombuhan kumaa do 14 tadau no. Sabaagi kouangan, kohobusan silaj i pinahabus nogi kivaa mikro-organisma probiotik i kaanu popoinsavat kohidasan tazam,” ka disido.

Minoboos isido, kohobusan GENKiMO nakahantoi Gaa Emas id kopokitanan BioMalaysia 2008 om Gaa Piok babaino SITF 2009 di Seoul, Korea Selatan.

“Kohobusan GENKiMO pinahabus miampai momoguno do kaganapan suvai pomutanaman vookon dino mantad pomounan paai miaga do himpunuk om tapo do paai i pinataam toi ko tinutudan, boogizan tanom om tuva-uva di au kosudong montok padagangon.

“Todoon tokou mahik iti pinataam organik i kazamut posoihi nung pohogoson do ingkakaa no nga miampai momoguno teknologi diti, iso pongindopuan kavavagu aanu monoodo om monoodo tokou kountungan mantad kinapanadaan mahik kaganapan pinataam i noonuan hoogo kouangan,” ka disido.

Minoboos i Yahya, kohobusan GENKiMO tumimpuun ginuno montok piipio angkab do komponi ngavi nakatantu id pogun diti vookon dino sabaagi do tiinumon probiotik tazam, taakanon aditif tazam om papahabus asil baja kompos kinontodonon tinja tazam om kaganapan pinataam do kilang piasau mamau.

“Pinoiho zou, piipio komponi id Semenanjung minomoguno do kohobusan GENKiMO miaga do ESPEK Liverstock Sdn. Bhd, Koisaan Mobubuvat Pogun Johor (PPNJ), projik ARB MARDITech Sdn. Bhd, miampai piipio projik pomutazaman manuk om nogi projik baja organic,” ka disido.

Minoboos isido, kohobusan miaga do baja komosit, kavavanit pongusap om taakanon tazam i momoguno teknologi GENKiMO, ajamin au kopomiumbak sandad posoihi om kaanu monguhan kobohingkangan ovutong id pomogompizan ngavi tazam miaga do manuk, kambing om sapi.

“Kounsikaan kumaa MARDI id kinohombusan teknologi kavavagu di kivaa hoogo di takavas. Pogun pointantu no do momoguno teknologi i kaanu popoinsavat kabaahan pomutanaman mooi kopiaga miampai pogun ngavi suvai ko kaanu modihin kozomutan,” ka disido.