POMUTANAMAN KIGUNO ID KOTUNDAAN IKONOMI

KOTA KINABALU: Boogian pomutanaman kitonggungan kiguno id suang popobuu ikonomi om mamajamin koumohigan sandad taakann pogun, ka di Kumoduvo Vozoon Montili Datuk Seri Panglim Yahya Hussin.

Isido i nogi Montili Pomutanaman om Pomounan Taakanon minoboos, suvai ko id boogizan pomutanaman nogi popotounda pakalajaan id uvang dahabus kakadazan om popoinsavat tangangazan mogiigizon id uvang dino. Kopiondot dino ka disido, kiangkab polinta poposimban boogizan pomutanaman kumaa pomounan ontodonon tanom om ontok timpu di miaga manaak pongintangan kumaa pilotian kinontodonon kapadagangan, poguhudan di kivaa tukuan ikonomi di tagazo om kigatang.

“Boogizan Ikonomi Kopoguhu Pogun (NKEA) Pomutanaman kivaa tohu kaandak kopoguhu ino nopo nga montok popoinsavat sakadai babaino tangangazan pogun kasar (PNK) kiginumu RM28.9 bilion kumaa RM49.1 bilion koikatan 2020.

“Koduvo, popoimbuhai kosivatan pakalajaan kavavagu kiginumu 74,600, id nombo vookon ginumu mantad dino tinuidong id uvang dahabus kakadazan om popoinsavat tangangazan mobubuvat kiginumu do induvo gisom inggapat kolipat,” ka disido.

Minoboos isido dino ontok minamason pinopoimagon Kotombuhuzan Miampai Mongkinobos Agrochallenge Sabah 2012, id Wisma Pertanian id doiti, di koniab.

Otumbazaan i Yahya miampai sokodung om pisokodungan boogizan misosondi hoohobi no kozo id suang kopopuvan potihombus id suang pomutanaman om agrotaakanon, hizab NKEA dino aanu humantoi.

Ka disido, hizab dino nogi aanu humantoi mazaa toihaan om koinsamakan kavavagu ino nopo nga Abaabazan Agrochallenge i naazu do Kolob Usahawan Tani Malaysia (KUAT).

Tuduvan abaabazan diti nopo nga montok manaak koponoguvangan projik projik kahantoi id Sabah, papahaab pongindopuan miampai pisokodungan, popointutun projik Agrotourism Sabah om popogiot pilotian nasional.

“Abaabazan KUAT poguhui diti nakapanau id pototongkop Semenanjung Malaysia om nogi tuminahib Asean miaga do Thailand om Indonesia miampai Australia.

“Mongunsub zou kaampazatan mantad tinimungan mobubuvat om agrotaakanon pogun Sabah id suang abaabazan Agrochallenge kumaa pogun Holland, China om India ontok toun 2013,” ka disido.

Humansan i Yahya kotombuhuzan miampai mongkinobos Agrochallenge Sabah kihinaid do onom tadau dino kopoimbuhai toihaan om inovasi kavavagu id suang kapapanaai kalaja boogizan pomutanaman montok humantoi angkab om hizab Palan Kosimbanan Boogizab Pomutanaman.

“Kotombuhuzan kumaa vahu projik pomutanaman om agrotaakanon id Sabah id Kundasang, Sandakan, Kunak, Semporna om Tawau nakahantoi nadadi pomitanan om pongunsub kumaa motivasi tinimungan mobubuvat id pogun diti.

“Pilotian Nasional id lahan kosudong diti pointantu no do kapanaak kahabazan ikonomi montok popoinsavat kohobusan taakanon pogun, koinsavatan tangangazan mogigiizon dahabus kakadazan om kouangan PNK,” ka disido.

Kotombuhuzan miampai tema “Integrasi Nasional Pomutanaman kumaa Kosimbanan Boogizan Taakanon Malaysia” dino naampazat 53 monongkibai id tinimungan mongindapu mobuvat om upisol mantad agensi kopolintaan mantad Semenanjung.

Naamot dino Monunuat KUAT Zahari Abu Yazid minoboos, kolob dino nopo nga iso koisaan okon polinta (NGO) i pinobuu do Komontilian Pomutanaman om Pomounan Ontodonon Tanom Malaysia (MOA) mantad po toun 2002.

“Tomoimo o KUAT misokodung miampai polinta id suang popoinsavat ningkokoton koposizon mogiigizon mobuvat id pogun diti.

“Mazaa kapapanaai kalaja miiso, KUAT tuutulus papanau boogizan pomutanaman kavavagu om popoinsavat boogizan pomutanaman di kivaa no haid mooi hobi kopountung om kaanu monongkiahi,” ka disido.