Koonduan mositi osiou popoinsavat kabaahan ICT

KOTA KINABALU: Koonduan mositi hobi osiou popoinsavat kabaahan id suang boogizan teknologi om pilotian (ICT) montok popobuu pongindopuan om mamadadi dino hongkod koopintutunan om kapadagangan pongindopuan.

Montili Kotundaan Mogiigizon om Ahal Momoguno Datuk Azizah Mohd Dun minoboos, iti kiguno saasabap no do ponongkiohian di noindamaan koponginam id suang boogizan ICT.

“Sundung i do ingkaa kokomoi koumohigan om hak kopomogunaan id suang boogizan ICT au aanu do popohogos. Tokou mositi misokodung manahob kahasaan tavagat miaga do ‘cyber bully’, pomodungan kotinanan, porografi om kapatazadan pogohundaan.

“Saasabap no dino, pongkimamaan Suruhanjaya Pilotian om Multimedia Malaysia (SKMM) minonoodo seminar diti nokotunud kozo do timpu dino montok manaak kasaavan om balajalan kumaa mogiigizon, hoohobi no kozo tinimungan koonduan kokomoi koumohigan id suang ICT om nogi hak sabaagi do momoguno id suang pomounan pilotian om multimedia id pogun diti,” ka disido.

Minoboos isido dino ontok minamason pinopoimagon Seminar Koonduan om ICT naazu SKMM Upis Wilayah Sabah kopiondot Tadau Pilotian om Mogiigizon Kikopoihaan Sompomogunan Pogun Sabah id Pasific Sutera, id doiti di koniab.

Minoboos i Azizah, mantad no kokusutan ikonomi om nouangan ginumu aiso kalaja id suang pogun, mongunsub o polinta layat pogun diti hoohobi no kozo tinimungan koonduan mooi do kogompit id suang boogizan pongindopuan om monuhung popohuzung ikonomi paganakan.

“Pomihian tema “Koonduan om ICT” kosudong kozo om nokotunud miampai pongkimamaan polinta di tomoimo monokodung poimponu kotundaan tinimungan koonduan id suang mogiigizon dotokou,” ka disido.

Tema koponoimaan Tadau Telekomunikasi om Mogiigizon Kikopoihaan Sompomogunan ino nopo nga “Wanita dan ICT” kiangkab manaak kasaavan kumaa mogiigizon kokomoi hivang om kosivatan di naanu mazaa pomogunaan internet om ICT montok popoinsavat tangangazan tinimungan koonduan id suang mogisusuvai boogizan.

Minoboos i Azizah, id savat pongkimamaan polinta mazaa Komontilian Kotundaan Koonduan, Paganakan om Mogiigizon pinopointutun abaabazan SOHO toi ko Smart Office-Home Office montok mongunsub layat pogun diti kogompit id suang pongindopuan kinontodonon ICT om papanaon id hamin miampai au tagal mikot id upis.

Abaabazan diti pinointutun kumaa saviavi tinimungan hoohobi no kozo koonduan i mantad mohoing tondu notongkizadan om koonduan aiso kalaja. Ino nogi mongunsub pomogunaan ICT id tinimungan koonduan montok monuhung momouang tangangazan paganakan, ka disido.

Minoboos isido, suvai ko momohuda om popobuu tele-pakalaja id suang mogisusuvai boogizan om pomounan, ino nogi kiangkab popoinsavat tangangazan tinimungan koonduan i nogi boogizan manakadai kumaa ikonomi paganakan om pogun.

“Polinta nga popotounda mogisusuvai kouhanan hoohobi nokozo montok koonduan dahabus kakadazan i au songkuo ponoguvangan id suang boogizan ICT.

“Vookon kouhanan dino nopo nga Hongkod Internet Desa, Medan Info Desa om Pambasaan Buuk Desa i kitonggungan kiguno manaak toihaan kogompit pomogunaan ICT kumaa tinimungan dino mooi hobi kikabaahan,” ka disido.

Nokotindapou nogi Potunud SKMM Wilayah Sabah om Labuan Bukhari Yahya.