Najib suminivat minonongkiumo layat id gana pitomuvan

KENINGAU: Pinapaanjul i Huguan Montili Datuk Seri Najib Tun Razak om tinonudan disido do pinomiomboan tosuau layat id Gana Pitomuvan, somok doiti om dinuungan miampai ‘taakanon kampung’ di ontok monginum doungosuab id gana pitomuvan nokomoi.

Najib, i tinanud di Vozoon Montili Sabah, Datuk Seri Musa Haji Amano m piipio buuan mogiigizon, sinuungan miampai guo, jagung tinanok om kasang tana tinanok, i kogumuan diho tinanom toi asil sondii do momumutanon id Keningau.

Naamot di Najib minakan taakanon kampung om monompuan do buuan mogiigizon posoihi i poindikau id sampaping miampai disido, au mamagabas kosivatan o tuhun ginumuan i mooi tomu (pasal Minggu) diho do papagambal buuan di okito noopo dioho tomoimo maza soomin tilivison.

Poingkuo po, poguhui minum doungosuab om di koikot id Gana Pitomuvan, di kiikila jaam ko 8.30 doungosuab, minimpanau i Najib suminoomo do mongingindapu om momimiombo tomu nokomoi om nogi tuhun ginumuan i nokoingat kinoikatan disido, tuutulus minuzud montok monongkitabi miampai buuan numbul koison do pomogunan diti.

“Doiti zou id pasal tomu diti mantad po di jaam ko 6 minsusuvab di tiinu. Di koniab, au zou nakaanu tuminabi miampai di Huguan Montili di ontok isido pinopoimagon do Hongkod Kinuama Hongon Sabah (Pusat Krafatangan Sabah) tu noindamaan ginumu tuhun. Di baino ounsikou zou kozo tu nakaanu tuminabi miampai disido,” ka di Piah Amil, 50.

Piah, songuhung momumutanom mantad Kampung Koritan, id kinoizonon piahatan do Tenom om Keningau, minangazou di Najib tu pinoposivat timpu songovian do layat, kaampai no tinimungan mobuubuvat miaga dosido sundung tu noikot tinangkangau miampai kalaja koupisan.

Naamot di Linah Justin, 54, songuhun mongingindapu id Gana Pitomuvan nokomoi nopo ng minoboos do pinoiho zosido do monombuhui i Najib do mongingindapu id tomu nokomoi mantad po di sominggu nakatahib om miaga tomoimo, ontok jaam ko 3 minsusuab, doiho no zosido id tomu nokomoi mogovit asil tinanom dosido montok dagangon.

Ontok jaam ko 4 minsusuvab, sundung tu daadagangon dosido miaga do kinotuan toomis (sayur manis), tunduk mundok om tavadak do naavi nobohi do mamamajak, poingkuo po nga au mininsud zosido mantad tomu nokomoi miampai monoimo monoimo dadagangon mantad tuhun suvai montok dagangon naamot mindad koikatan di Huguan Montili.

“Intangan zou no diti. poimbasaan zou gaung T kisuat “I Love PM”.

Mimang do mongindad zou disido. Di doungadau koniab (songkoniab), di ontok koikot i PM id tutubpoon kapal Keningau, au zou nokosivat tuminabi miampai disido tu kivaa toinaon ku, magagung.

“Ontok di Hongkod Kinuama Hongon Sabah, kakaal au nakaanu tuminabi miampai di Huguan Montili tu noindamaan osodu isido, noindamaan ginumu tuhun. Doungosuab di baino (koniab) vagu nogi nakaanu zou tuminabi. Di baino diti nakaanu nokosoomo disido totootopot. Di poguhui diti okito ku noopo id tilivison, baino diti miaga tuhun topuak i moboos “live” punya,” ka Lina, i ponogi zi-aka kumaa di Puu Hintuun Koundangan Pogun (Adun) Bingkor, Datuk Justin Guka.

Montok di Dullah Kandihong, 80, songuhun mohoingon kampung nopo nga koduumak mikot mantad Kampung Lintuhun Baru, Sook, sababaa montok sumoomo di Najib montok popobuzu kobohingkaangan disido om hobi 200 monununda tana toi peneroka id kampung disido tu au po nakaanu galan tana sundung tu minongupalai dino mantad po di 30 toun nakatahib.

“Ontok pinokito ku i Huguan Montili do suat pokiinsianan, minoboos kuminaa dogo do ‘ok ada kosusa’,” ka di Dullah i poindikai totootopot id dabping miampai di Najib di ontok minimum doungosuab, naamot pinopokito suat pokiinsianan disido miampai suat sinuat sondii di Najib kituni “Boogizan kokuasaan montok uhanon”.

Minudizo nogi i PM do poingkuo no uvang Sook, suminimba zou do ada kosusa, au po insan izioho kaaha. Minuot vagu i PM, uvang di Tan Sri Joseph Kurup koni?, suminimba zou do oo,” ka di Dullah i kihizab monoodo dingkai montok podokotan poster di Najib i tandaan tuntuu di Najib id Gana Pitomuvan nokomoi.

Songuhun bagas pulis, i Abdullah Antobon, 78, mantad Kampung Tuaran, doiho id tomu nokomoi mantad po di jaam ko 6 doungosuab nga nounsikou nogi kozo miampai kinoikatan di Najib do doiho om kaanu noopo popoboos “bagus, bagus, bagus: di ontok udizoo.