POLINTA PISOMPUUVAN SUMOKODUNG PONUIDONGAN KOLEJ KDM, KA DI NAJIB

TAMBUNAN: Minoboos i Huguan Montili, Datuk Seri Najib Tun Razak do au atagakan o buuan do pangkat toi ningkokoton di takavas nung osuau toi mamantang do layat.

Ka disido, poungkadanan buhanut sumunsui gamut au atagak bisan dau, ingkaa nogi o buuan, au atagak kuasa dau nung mamantang do layat id siibo.

Pinopoboos i Huguan Montili do ahal diho di ontok pinopohombus pason id Abaabazan Miampai Layat om Mamabak Tana do Kolej KDM, id Pisompuruan Square Tambunan, do doiti di koniab.

“Pinomusaavan diti nabalajalan ku mantad di Tongotiagak tama ku di ontok suminoomo di tongotiagak Orang Kaya-Kaya (OKK) Sedomon di ontok minuimpongo kosuangan do Sabah miampai ponoidongan pomogunan Malaysia di poguhu,” ka disido.

Ontok timpu dii ka disido, miniumpongo i tama disido, Tun Abdul Razak Hussien miampai di OKK Sedomon id Hamin Tagazo, id Bingkor, Keningau, i kohimpupuun dino au kotumbozo do Sabah manung Malaysia.

“Pinitubungan diho minogovit asil di songian i tama ku huminuduk sondii om pinopoboos di OKK Sedomon sabaagi tama, mantad diho do nagazat i OKK Sedomon miampai boos diho om nokotumbozo om pinopoboos kotoundaan disido do mogovit tuhun Kadazan Dusun Murut, hobi no id uvang Sokid do monongkiamung ponuidongan Malaysia,” ka di Najib.

Mantad diho ka disido, buuan ngaavi do baino diti mositi no do mamantang layat id siibo mooi do agazat izioho miampai koimaan miaga diho om insan insan manaak sokodung kumaa doid Kopolintaan Barisan Nasional (BN).

Id songovian diho ka di Huguan Montikli, mositi no o tuhun mogiigizon nosizun tinau id pomogunan Malaysia diti do mogipapantang miampai mongiho ningkokoton toi pangkat.

“Minikot zou id Tambunan tu mamantang zou do tuhun KDM om mogiigizon do songovian dino id uvang Sokid,” ka di Najib.

Najib, i sabaagi Huguan Montili di koiso nogi minikot id Tambunan, minoboos do nipizan koiso disido nopo nga montok mombii do pomogunan Malaysia diti oumohig om otoonong sundung tu mantad do mogisuusuvai tinau om kotumbazaan.

“Nipizan koduvo ku nopo nga kumaandak mombii kosimbanon kotundaan habus kakadazan do aanu opiumanan do savi avi boogizan layat id pomogunan diti. om inipizon kotohu ku nopo nga momusoou poingkuo zou om tambahut id suang BN id nazatan Pisompuuban om pogun do manaak kotundaan kumaa layat,” ka disido.

Hizab do kopolintaan diti ka di Najib, nopo nga aanangan mombii do layat id pomogunan diti do kaanu mongunonom kotundaan isiibo tavan totomomou angkab 1Malaysia.

Kokomoi miampai kotundaan di pinaanjul do kopolintaan BN, minoboos i Najib do au tagal isido mangait dino tu layat sondii, hobi no do mogiigizon Tambunan nokoiho no mamagatang diho.

“Okon ko miaga tokou do gugumaga i koiho noopo papatazad batos nga au kaanu monuhuk dino. Mamatos tokou om tuhukon tokou batos,” ka di Najib.

Minongomi kokomoi ponuidongan Kolej KDM id Tambunan, minoboos i Najib do ponuidongan diho nopo nga koontok kozo.

Minoboos i Najib do kinoikatan disido id Tambunan nopo nga haang monokodung pongukaban do Kolej KDM hobi no id uvang diti, om id Sokid do songovian dino.

“Okon ko monokodung tokou noopo nga misokodung songovian o Kopolintaan Hongkod om Kopolintaan Pogun do munundun panadaan Kolej KDM diho,” ka disido.

Potindapou nogi doid abaabazan diho i Vozoon Montili Sabah, Datuk Seri Musa Haji Aman, Kumoduvo Vozoon Montili Sabah, Tan Sri Joseph Pairin Kitingan, Momumuntu Hintuun Koundangan Pogun (DUN) Sabah, Datuk Seri Mohd Salleh Tun Said, Montili Kotombuhuzan, Koubasanan om Sandad Posoihi Datuk Masidi Manjun, Monunuat Kopolintan Pogun Sabah Tan Sri Sukarti Wakiman, sinavaan di Huguan Montili Datin Seri Rosmah Mansor, sinavaan di Vozoon Montili Datin Seri Hajah Faridah Haji Tussin, sinavaan di Tan Sri Pairin i Puan Sri Genevieve Kitingan, huguan ngaavi koupisan kopolintaan om buuan ngaavi tuhun mogiigizon.

Di poguhui diho, minonongkotohuod i Pairin kuminaa doid kopolintaan Pisompuuvan buu’anon di Najib i minanaak sumbu totomou montok ponuidongan do Kolej Komuniti, i pisosoomo pavaahon id Kampung, Kaingaran, i pungaanan do Kolej KDM.

Minamagatang nogi isido do kinoikatan di Najib id Tambunan, i tumanud disido sabaagi Huguan Montili do koiso nogi nokoimpai id uvang nokomoi.

Minamagatang nogi i Pairin do sokodung sinoou mantad mogisuusuvai boogizan, kaampai no Koisaan Kotundunan om Balajalan Kadazandusun Murut Sabah (Pekadin) montok mamahantoi ponuidongan Kolej KDM diti.