SABAH OTUHID POPOINSAVAT NINGKOKOTON BALAJALAN

KOTA KINABALU: Polinta pogun Sabah mazaa Kolej Yayasan Sabah (KYS) tuutulus papavakas ningkokoton balajalan id pogun diti kumaa nazatan takavas montok popoimbuhai hobi ginumu pomitanan tuhun kahantoi montok tumungkus pomolintaan pogun ontok timpu mikot.

Vozoon Montili Datuk Seri Musa Aman minoboos iti kopitanud miampai angakb KYS montok poinsavaton ningkokoton dumadi iso kolej univositi id suang timpu okuang mantad duvo toun.

“Mokianu tokou mooi KYS poinsavaton ningkokoton (dumadi) univositi id nombo babaino id suang ningkokoton Komontilian Balajalan Takavas om kapanadaan kolej di kaanu popotindooi hobi ginumu susumikul kopitanud miampai KYS sabaagi iso misi manaak balajalan kumaa tanak ngavi kinoionon balajal id boogizan di hobi kinavas,” ka disido.

Minoboos isido dino ontok nasamaanan magaganu abal kahapas pinopotunui gaa Sikulasip Kahantazan Pogun Sabah siri ko-23 kuminaa 25 susumikul avasi nangangazan Sijil Pelajaran Malaysia id Menar Tun Mustapha id doiti, di koniab.

Musa i nogi Ponikoon Kotinanan Mongingit Amanah Yayasan Sabah minoboos tomoimo polinta popolipat pongkimamaan montok mongintong hobi ginumu layat id pogun diti kaanu kosivatan popoinsavat balajalan kaampai no popotounda sakadai di tagazo miampai poopbuu kouhanan balajalan.

“Sabaagi polinta di asabi miampai kopokionuan tuhun tomuho, mongkimamaa tokou montok popotounda mogisusuvai panaak id boogizan sakadai miaga do sikulasip om pagahasan kumaa susumikul.

Humansan zou nogi tanak ngavi tomuhok id pogun diti tuutulus mongkimamaa monoodo kahantazan id suang balajalan om tuutulus papadahin kinavas koposizon pagahanan kopitanud miampai tuduvan Yayasan Sabah montok popoinsavat kualiti koposizon layat id pogun diti,” ka disido.

Kopiondot dino, otumbazaan i Musa pogun au oovian buuan nung tinimungan tomuhok i nogi aset kiguno tuutulus popobuu dioho sondii montok popotihombus kotundaan pogun.

Naamot dino, minonugut kopokionuan Koisaan Mahasiswa Sabah id Semenanjung mooi do kootulan ngavi kapanaakan sikulasip pohuvaon, minoboos isido: “Boogizan Kotundaan Balajalan Yayasan Sabah monoizuk onu nopo pongingintong om kopokionuan sundung tu kootulan ahaid no nokoimbuhai i kivaa toihaan pointantu i poimpatut om otoimo.”

Kiginumu do 369 susumikul minonoimo kapanaakan sakadai sikulasip Kahantazan Pogun Sabah mantad po pinotimpuun ontok 1990.