POLINTA MONGKIMAMAA POPOBUU OKU: MUSA

KOTA KINABALU: Kahantazan do Tuhun Au Kadansaan (OKU) kopokito izioho nga kitonggungan kiguno id suang mogovit kotundaan om kobuuon ikonomi pogun hoohobi no kozo id Sabah.

Kopiondot dino Vozoon Montili Datuk Seri Musa Haji Aman mokianu mooi kouhanan montok OKU pobuuon id saviavi louting om kompleks pototongkop pogun montok kovosian tinimungan dino.

Ka disido Abaabazan Balajalan OKU nogi atahang kopokito kapanaakan ningkokoton polinta kumaa tinimungan pakalaja OKU i minanaak kotoinaan tavasi sohinaid do pakalaja miampai tampat pakalajaan om montok mongindapu OKU i nakahantoi id suang pongindopuan.

“Kosivatan di tinaak tampat pakalajaan kopokito do izioho tootopot tinimungan di ohuduk, kotoboi, otuhid, dedikasi om abaa.

“Mantad dino humansan zou mooi abaabazan di naazu diti adadi pongunsub kumaa tampat pakalajaan montok mamagaji tinimungan OKU pakalaja id suang tinimungan dioho,” ka disido.

Minoboos isido dino id suang teks pason disido kopiondot Lamai Balajalan Tuhun Au Kadansaan (OKU) Nazatan Pogun Sabah, id Dewan Wisma Wanita, id doiti, di koniab.

Teks pason disido binasa di Montili Kotundaan Mogiigizon om Ahal Momoguno Datuk Hajah Azizah Mohd Dun.

Minoboos i Musa, tomoimo polinta osianan om mongkimamaa kumaa kopotutan saviavi mogiigizon kaampai no OKU miampai popotounda mogisusuvai kouhanan montok tinimungan dino.

“Kopotoundaan kouhanan ngavi miaga do tampat poizanan kulita, kouhanan hivang vazaan om pagavasan montok OKU id potitikid louting, kompleks pomomohizan om upis nopo nga tanda tatahang kosianan polinta id suang mongumohig om popobuu nasil layat kopitanud miampai “Gagasan 1Malaysia, Layat Posoguhuonon, Nangangazan Poguhonon,” ka disido.

Monongkotohuod isido kumaa Koupisan Kotoinaan Kotundunan Am, Komontilian Kotundaan Mogiigizon om Ahal Momoguno, Koupisan Vinakas Kalaja Sabah om PERKESO, Komontilian Sandad Vinakas Tuhun Malaysia id pongkimamaan montok popotounda abaabazan dino.

“Ahansan tinimungan OKU tuutulus mongkimamaa miampai kotoboi om poimponu dedikasi montok tuutulus kobuu om kahantoi id suang boogizan di naampazat,” ka disido.