258,943 momogun Sabah kopongundi daa nga au nokolijistol

KOTA KINABALU: Soginumu 258,943 momogun Sabah kiumul 21 id savat om kavasa daa mongundi do au po nokolijistol sabaagi momimihi.

Minoboos i Kumoduvo Poniikon Suruhajaya Pomihian Tagazo (SPR) Malaysia, Datuk Wira Wan Ahmad Wan Omar do miampai songovian diho, soginumu 1,205,581 momoguno id pogun Sabah diti kavasa daa mongundi nga kivaa no 946,638 i nokolijistol.

“Komozon do SPR o ginumu diti do agazo, sundung tu okon miaga gunumu do pogun ngaavi suvai. Mantad diho, monuu zou kumaa doid dioho i au po nokolijistol mooi do lijistol tosisikap. Ada kotongob songian pomihian tagazo do poonjulon, nunu i kiguno nopo nga lijistol mooi do kaanu monuhuk tonggungan sabaagi momimihi,” ka disido.

Noboos disido iti di ontok kopoihaan abal di kahapas pinituubungan miampai hahansanon ngaavi paati pogun Sabah kokomoi Tinimungan Kokuasaan Kimpin Pomihian Tagazo (PP KPR), id Pasific Sutera Harbour, do doiti di koniab.

Pinituubungan diho nopo nga numpazat do huguan ngaavi buuan do savi avi paati komponen Barisan Nasional (BN) id Sabah om paati ngaavi gugumaga, kaampai no Parti Tindakan Demokratik (DAP), Parti Keadilan Rakyat (PKR), Parti Reformasi Negeri (STAR), Parti Islam SeMalaysia (PAS), Parti Maju Sabah (SAPP) Paeri Bersatu Sasa Malaysia (BERSAMA) om Parti Kesejahteraan Insan Tanah Airi (KITA).

Potindapou nogi diho i Potunud Pomihian Tagazo Pogun Sabah, Datuk Haji Md Idris Ismail om Puu Pomihian Tagazo Hahansanon Pogun Sabah, Datuk Jamdin Buyong.

Pinoposoou nogi i Wan Ahmad doid momimihi ngaavi di nokolijistol mooi do mombii mahik ngaan om uvang dioho mongundi.

“Pombiian mahik do lijistol momimihi id pogun Sabah diti nopo nga aanu maan sohinaid sombuhan, iho nopo nga mantad po di ko 1 vuhan Koonom nakatahib, maza kotoinaan pason toniibo (SMS) miampai manaip SPRSEMAKNo Kad Kointutunan om pootodon kumaa id numbul 1588 toi miampai monuubung id numbul tilifon do Upis SPR pogun id 088 488588,” ka disido.

Minoboos isido do montok monoguvang Pomihian Tagazo Ko-13 (PRU-13), minonuidong o SPR do 31 tinimungan kokuasaan Kimpim Pomihian Tagazo (PP-KPE) montok hansanon do potitikid uvang Parlimen id pogun Sabah diti, kaampai no id Labuan.

“Potitikid uvang Parlimen nopo nga hansanon iso tinimungan, naamot do Kota Kinabalu om Sandakan nopo nga tososondii do kivaa duvo tinimungan tu uvang diho ahaab om ginumu mongungundi di togumu,” ka disido.

Minoboos i Wan Ahmad do tinimungan diho nopo nga monoihi savi avi tapanazan kimpin id pomihian tagazo do mikot i tumimpuun ontok timpu kavasaan kimpin.

“Tinimungan diti kavasa popoindau toi mongidu poster toi kakamot kimpin di popokito kointahangan mogohundaat, i kaanu popoikum di mingkakat mokipihi, ahal di kokombit kosabian, ahal doun sondii, ahal ngaavi kotinau’an, ugama om i popoimbuhai kohohodong do tuhun ginumuan,” ka disido.

Minoboos isido do potitikid tinimungan nopo nga buuanon do songuhun upisol SPR, umpazaton do pulis kipangkat Inspektor toi hobi kinavas, upisol boogizan kokuasaan kinoizonon (PBT) om hahansanit paati toi i mingkakat do mokipihi.

Kogompit miampai pituubungan songovian do hahansanon ngaavi paati pulitik id pogun Sabah diti, minoboos i Wan Ahmad do iho nopo nga kopointahangan kokomoi kopokuasaan songian kimpin pomihian tagazo montok manaak kolatian kumaa doid savi avi buuan paati kokomoi nunu i miho o au miho do maan.

“Mositi tokou popoimbuhai kozuuzuvo kimpin di otoonong, mogipapantang om au popoimbuhai pioduan do tuhun ginumuan montok kavasian do momogun.

“Nunu noopo haang do PP-KPK nopo nga aadang, asil om au poinhiad kumaa nonomboo paati,” ka disido.

Minoboos isido do vookon di pogoduan songian sumuang id hongkod pongundian nopo nga gambal di mingkakat mokipihi om logo nonomboo paati.

“Iisai noopo mongungundi di kumaandak sumuang id hivang pongundian om momoguno tudung, tupi toi gaung di kivaa symbol paati toi gambal di mingkakat mokipihi nopo nga au pavasaon id hivang nokomoi tu komozon do kimpin,” ka disido.