Polinta momohoogo tonggungan buuan mogiigizon sabaagi do mato tohingo polinta

BEAUFORT: Polinta pogun Sabah momohoogo tonggungan kiguno buuan mogiigizon i minaganu haang sabaagi do mato om tohingo polinta id suang monguhan kobohingkangan layat.

Vozoon Montili Datuk Seri Musa Aman minoboos buuan mogiigizon i mantad dioho mohoingon kampung, ponikoon Komiti kikuasa Kobuuon om Koumohigan Kampung, Ketua anak negeri, huguan uvang om huguan kapitan Sina mositi misokodung id suang popohuzung kopoihaan di kotunud mooi nuununu kotundaan miampai sakadai kadampot kumaa nazatan sunsud.

“Buuan mogiigizon kavasa monoodo pisamanan miampai layat mazaa abaabazan miaga do mitabang om kalamazan… popoiho do layat do polinta Barisan Nasional (BN) nopo nga polinta di osianan om asabi kumaa nasip layat,” ka disido ontok minamason di doguvang kuang hobi 500 huguan mogiigizon zon sokid siibo mantad uvang Beaufort, Sipitang om Kuala Penyu id doiti, di koniab.

Minoboos isido layat mositi tomoimo poihoon kokomoi kosianan kotundaan potihombus i oviton do polinta Bn id siibo kopomuanan Huguan Montili Datuk Seri Najib Tun Razak i minonoodo mogisusuvai kosimbanan montok pogun diti.

Ontok po nogi dino, minoboos i Musa saviavi hahansanon layat i nopihi nga au apatut momusoou ningkokoton dioho sabaagi do iso ‘kovosian’, id sambahik dino tuutulus pakalaja tavavakas montok monguhan saviavi kobohingkangan layat id uvang dioho.

Minagangat nogi isido layt Sabah mooi tuutulus popotindooi pihumaagan om kaadangan pulitik pogun saasabap no do pogun diti, kaampai no Sabah, adadi gogondoon papaapu i pointantu do papaapu mantad dahabus pogun.

Minoboos i Musa tumanud pisamaanan disido miampai papaapu toi ko hahansanon polinta dahabus poguhui diti, kaanu isido moboos do ogumu komponi dahabus momihi Sabah montok papaapu billion linggit tumanud ningkokoton pulitik di taadang, posoihi dino i ogingo suvai ko boogizan layat dino i agaan ginavo.

Ka disido layat aiso do pihi polinta di hobi vinasi suvai ko mantad BN tu kotundunan layat hobi ogompi mantad no kosimbanan Najib i poposoguhu dioho id siibo gagasan 1Malaysia mantad po minongigit do pomolintaan.

“Pogun Sabah hoohobi no kozo hobi nokobuu id siibo BN piagahon piipio pogun id Semenanjung i tinoina gugumaga di noduanan om au kaanu montok popobuu pogun gisom polinta hongkod monuhung manaak sakadai,” ka disido.

Nokotindapou nogi Montili Kotundaan Mogiigizon om Ahal Momoguno Sabah Datuk Azizash Mohd Dun i nogi puu Dewan Koundangan Pogun uvang Klias om Speaker Dewan Koundangan Pogun Sabah nogi Kumoduvo ponikoon Tinan Pionitan Umno Sabah Datuk Seri Salleh Said Keruak.