Mononontuduk do USAHA minongunsub momumutanom tongonini tumihombus miiso

PENAMPANG: Mononontuduk Kotinanan Pisompuuvan Momumukabun Tongonini Sabah (USAHA) di kavavagu dinadi, i Tan Sri Simon Sipuan, minongunsub doid momumukabun ngaavi tongonini id pogun Sabah diti do tumihombus miiso id saau pazung do kotinanan.

Tumanud disido, momumukabung ngaavi tongonini nopo nga kotoguvang ponginaman di togumu id pinggisoman popobuu do pomounan dioho tososondii om aanu iti ouhanan sokio nung kalati izioho songkuo guno do miiso potindugu.

Simon, isido ponogi i sabaagi Puu Panel Kotinanan Panahoban Ponuapan Malaysia (Suruhanjaya Pencegahan Rasuah Malaysia) om nogi bagas Pesuruhjaya Suruhanjaya Suhakam, minonoimo kinopomododizan sabaagi mononontuduk do USAHA di ontok Abaabazan Muhibbah i nazu do kotinanan nokomoi di tadau Minggu nakatahib, id Hongkod Koisaan, KDCA, do doiti.

Kivaa puu do USAHA hobi mantad 5,000 do momumukabun tongonini mantad mogisuusuvai pomounan id pototongkop pogun Sabah diti.

Tumanud vagu di Simon, mositi o momumukabun ngaavi tongonini do tomoimo kivaa inovatif doid kopoingkavasan kohabusan dioho miampai momoguno mogisuusuvai teknologi di kivaa poinsandad.

Naamot diho, minangazou i Polosidin Koisaan Kebangsaan Momumukabung Tongonini Malaysia (PKPKM), Dato’ Haji Aliasak Haji Ambian, i sabaagi tahap tapantang id abaabazan nokomoi, kogompitan do USAHA doid kapanakadazan do momumukabun ngaavi tongonini id pogun Sabah diti montok kotihombus kahantoi.

Minangazou nogi isido do kogompitan di pinokito di Polosidin USAHA, i Chua men Nam, kinopogovitan do kotinanan tagazo diho id gontob di hobi po vagu kinavas. Ontok ponogi diho, noihaan disido do kalaja di saanon disido okon ko ouhan, nga noponu miampai ponginaman, nga otumbazaan isido do miampai pimpaagatan, insan tadau, tuduvan di kaandakan ahantoi adadi katapaan.

Nagazat nogi isido miampai mogisuusuvai pinggisoman di nanu do kotinanan nokomoi montok manakadai do momumukabun tongonini gata miampai mongunsub dioho mananom guvas gata di kaanu popovuhai asil takavas miampai minongukab hivang pananaman bibit id piipio kampung.

Hobi 500 tuhun nokotindapou kopiondot Lamai Muhibbbah nokomoi, i pinosindak povagu miampai mogisuusuvai abaabazan kosohimbaan kagazat, kaampai no kohsohimbaan suku tinau Rungus, kosohimbaan hozou mantad Bontugan Bintang Kecil, nazatan nasional, i Presley Petrus om tama disido, i Petrus Martin om kosohimbaan mantad paganakan di Onngkino Moidon, manta Penampang, i popovuhai album koiso dioho.