Ponginaman do songuhun momumuhasa magaau om manazang kulita au nadadi tu steering kinaving do sinavaan

 

Di MARUTIN ANSIUNG marutin@newsabahtimes.com.my

KENINGAU: Ponginaman do songuhun momumuhasa minagaau om minanazang iso kulita sanganu do songuhun mongingia, au nakaanu di songian o sinavaan do mongingia nokomoi nokosivat minangaving steering do kulita gisom nokobibi id bahazan do lahan.

Minoboos i Huguan Pulis Uvang Keningau, DSP Douglas Nyeging Taong, do id pinonontohan kohimpupuunon, noihaan i minangadu do minomoduan kulita kavo Isuzu D’Max, id sampaping do hinominon Public Bank, doiti id koozuvo injin dino kakaal poimpasi om kulita au nokunsian taangob, naamot minooi pomohi baabalang id kadai Mee Woo, di kuang hobi jaam ko 7.30 totuvong, di tadau Kohimo nakatahib.

Ka di Douglas, ontok duanai di minangadu o kulita, doiho id suang kulita o sinavaan di minangadu miampai do tambahut sinavaan om tanak dioho.

“Di piipio minit suminusuut, huminabus i minangadu mantad kadai nokomoi om noihaan o kulita disido do aino om noongou gizak mantad tuhun ginumuan do kivaa kulita nokobibi poguhui nokoikot id tutuugon lahan somok do Balai Bomba,” ka disido di ontok pokionuo pinopoimagon do kinaantakan nokomoi.

Ka disido, sinusuut di minangadu do minooi id hivang dino om noihaan do kulita nokomoi nopo nga dau sanganu. “Id pinonoizukan kotihombusan, noihaan do ontok i minangadu minomoduan kulita, sinavaan di minangadu au pinopokunsi do kulita om miampai sakahi do songuhun kusai suminuang id kulita om minogovit minogiduan do kulita dino pinakaazan id Balai Bomba Keningau,” ka disido.

Sungdung do poingkuo ka disido, sinavaan di minangadu kumininam huminavan miampai minangaving do steering kulita om nakasabap do kulita dino nokobibi id disan lahan somok tutuugon lahan om pinotood di natantaman o kulita nokomoi.

“Nokosivat po i natantaman do minanapap voos sinavaan di minangadu poguhui minogiduan do kulita,” ka vagu disido.

Tumanud di sinavaan di minangadu, sosonguhun no i natantaman om poimbasaan gaung kivotik otomou om souvan jeans natahup kivotik opuak id gontob totud.

Pinopoiho i Douglas do id pinonoizukan id hivang kinaantakan, noihaan i minangadu do pinopotood kulita kivavaa osodu mantad hinomino Public Bank om pinongutipan gagambalan poinhosok (CCTV) au kopongintong do kulita di minangadu.

Ka disido, atalang id hivang kinaantakan om ogumu tuhun ginumuan di posoihi.

Ponoizukan diho kakaal pinotihombus id siibo Seksyen 389A/511 Kanun Koundosoan kuminam manakau kulita. Minoboos isidi do tihombuson do pulis magasu do songuhun kusai i au kozo nointutunan o bangsa, kikoinano abagkong om anau tobuk. Pinapanau nogi do pulis o pongihaan Fotofit kumaa di natantaman.

Mantad diho, pinokianu di Douglas o tuhun ginumuan i nokokito kinaantakan om kaanu mongintutun di natantaman do mikot id boogizan Ponoizukan Kahasaan montok manakadai ponoizukan.

Pinoposoou nogi isido do tuhun ginumuan mooi do au momoduan kulita dioho id koozuvo injin poimpasi. Suvai diho, tuhun ginumuan, hobi no do papapanau mooi do au popotood kulita id hivang di akadop om au momoduan tanak ngaavi om nogi kantung toi bakaang di kigatang id suang kulita.

Ka disido, kakalagan do manamong koumohigan sondii om kotos bakaang manaak kosivatan kumaa momumuhasan do papapanau tapanazan kahasaan.

 
By : MARUTIN ANSIUNG
 
New Sabah Times