Kartel daging: kada’ komoyo’ nasalasai, KPDNHEP amu’ po ‘nokopomoug’

 

KUALA LUMPUR: Komontirian Pidagangan Suang Pogun om Ahal Momoguno (KDPNHEP) momonsoi kopogintongan do poompus om ponungodan do potilombus kohondot komponi toi popoikid kopogompit daging nudar do aiso’ notis ontok soiraira nopo timpu.

Kumoduo montiri dilo’ Datuk Rosol Wahid minoboros komontirian amu’ po ‘nokopomoug’ kohondot di ahal dilo’ om kopogintongan potilombus kituduan papatantu’ oinsanan daging di nudar sumuang kumaa Malaysia nopo nga’ halal.

“Komontirian nga’ manahak nogi do jominan do oinsanan daging nudar i haro id pidagangan do babaino’ diti nopo nga’ halal… i naantakan di kaawagu diti, natalaban om noilaan tokou.

“Tonggungan tokou papatantu’ oinsanan daging i sumuang kumaa Malaysia mositi halal suai ko’ daging wogok, ilo’ nopo nga’ id bohogian di suai,” ka disio.

Minoboros isio dilo’ kumaa magaganu habar katalib minomonsoi kinopogintongan kotonudan skim gatang bobos takawas timpu karamaian Krismas i notindapou nogi di Potundu KPDNHEP Terengganu, Saharuddin Mohd Kia id songinan pasar tagayo do hiti, konihab.

Id ahal di suai, minoboros isio do soginumu’ 9,629 premis pongindopuan id poliliput pomogunon noporisa do KPDNHEP montok timpu ko 22tw Kohopod om Duo gisom ko 29tw Kohopod om Duo montok kopogintongan Skim Gatang Maksimum Karamaian Krismas diti baino’.

Ka di Rosol, mantad pinomorisaan poompus timpu dilo’ nokoporikod no do 10 kes kinasalaan miampai ginumu’ kompaun RM1,100 om tintob naahou RM386.-Bernama

 
By :
 
New Sabah Times