226 MOGIIGIZON NOGOMPITAN KOGUZUAN TANA NOKOTOIMO SAKADAI

 

Di MARRYAN RAZAN marryan@newsabahtimes.com.my

KOTA BELUD: Katangaban i notoguvang 226 mogiigizon id mintingisan nuhu Kinabalu id uvang diti, mantad no kinantakan kinoguzuan tana i notoguvang do uvang Ranau di Vuhan Koonom toun nakatahib nakaanu pongintangan polinta.

Iti pointahang miampai kinopotunuzan sakadai polinta pogun kiginumu RM678,000 kumaa munggui i nogompitan miampai nokotoguvang koumbakan hamin saasabap no do kinantakan id dahabus pomusaavan.

Sakadai dino pinotunui di Montili Pilotian om Multimedia i nogi Puu Dewan Koundangan Pogun (Adun) Usukan Datuk Seri Dr Salleh Said Keruak.

Lamai kopotunuzan sakadai usin kosianan polinta pogun dino naazu id Dewan Datuk Zakaria Louting Urusetia Haid Upis Uvang Kota Belud, id doiti di koniab.

Nokotindapou nogi Upisol Uvang Kota Belud i nogi Ponikoon Komiti Koumbakan Uvang Abdul Gari Itam. Nokosoguhu id suang pason disido, minoboos i Abdul Gari sakadai kiginumu RM3,000 kumaa potitikid mononoimo nopo nga sakadai totuhid polinta pogun montok mongingaan tonggungan munggui.

“Iti kopokito pilotian om pongkimamaan polinta monuhung om manaak kouhanan kumaa saviavi mogiigizon di nokotoguvang nuununu kobohingkangan,” ka disido.

Minamason kumaa magaganu abal kahapas dino Abdul Gari minoboos sakadai dino okon ko pamaganti kinolugian toi ko pambalai kumaa koumbakan di notoguvang do munggui kinoguzuan tana, nga ino sakadai montok monguang tonggungan dioho.

Ka vagu disido, boogizan disido baino maamaso mogium sakadai montok monoodo mahik 11 hamin di nokotoguvang koumbakan noindamaan saasabap no do kinantakan dino.

“Minonoodo tokou pibaasan kokomoi ahal dino miampai boogizan kogompit om kivaa piipio ahal i mositi todoon poguhui monoodo mahik hamin dino kaampai no tampat kavavagu di hobi atampasi.

“Humansan tokou hamin dino aanu monoodo miampai tosisikap dati,” ka disido.

Kinantakan kinoguzuan tana kitukuan 5.9 id skala Richter i nantakan posoihi jam ko 7.15 minsusuvab di ko 5 Vuhan Koonom nakatahib, nokopogompit kiniopon 18 tutumakad kaampai no apat malim nuhu, miampai nontodonon do koumbakan hamin om louting id piipio kampung posoihi Kota Belud om Ranau.

 
By : MARRYAN RAZAN
 
New Sabah Times