Soginumu' 7,987 calun SPM 2009 nakaanu naangayan tosonong

PUTRAJAYA: Soginumu’ do 7,987 calun Setifikit Palajaran Malaysia (SPM) toun 2009 nakaanu gred takawas (A+, A, om/toi A-) montok toinsanan mato palajaran di nindikau, nung poiradon di 6,277 di 2008.

I Luguan Potunud Palajaran Tan Sri Alimuddin Mohd Dom, minoboros mantad tintob dilo’, soginumu’ do 214 calun nakalantoi nakaanu gred bobos takawas (Cemerlang Tertinggi) (A+) montok kinopomogredan di wagu i pinointutunan di toun nakatalib.

Minoboros isio do gred Bobos Takawas pinointutunan sabaagi gred di lobi kasawat ko’ mantad gred 1A montok poposorisid po do naangayan di sosongulun calun.

“Ounsikou oku popoilo do id koinsanai nopo, gulampot calun do baino’ diti kopoondos kopio, katalib ko’ mantad di nosigamot toun nokopogulu.

“Gulampot calun nokoinsawat id sunduk pihotusan tintob nakaanu setifikit, cemerlang (A+, A om/toi A-) om nolulus doid toinsanan mato palajaran di nindikahanan,” ka disio ontok pinapahabar do kinoponorisidan kootusan SPM om Setifikit Takawas Ugama’ Malaysia (STAM) 2009 id Komontirian Palajaran do hiti konihab.

Ka disio, soginumu’ do 465,853 calun nokorojistor montok mindikau poporisaan diti di toun nakatalib.

Minoboros i Alimuddin do mantad di 59,433 calun mimpopori, sikul poriwit om sikul-sikul sinakadai agensi suai ko’ Komontirian Palajaran, soginumu’ do 41 tulun nakaanu gred Cemerlang Tertinggi (A+).

Pinahabar po nogi’ disio do i Gladys Tan Yee Kim mantad Sikul Mananga’ Kabansaan (SMK) Green Road, Kuching, Sarawak sabaagi susumikul bobos tosonong naangayan montok SPM 2009 om Sikul Mananga’ Sains Seremban, Negeri Sembilan sabaagi sikul bobos tosonong naangayan.

Ka disio, montok 10 sikul susumikul bobos tosonong, siam susumikul di suai nopo nga’ i Grace Kiew Sze-Ern (SMK (P) Sri Aman, Petaling Jaya, Selangor), Khadijah Ahmad Jais (SM Agama Persekutuan Labu, Negeri Sembilan), Akmal Hidayat Sabri (SMK Derma, Kangar, Perlis), Syamilah Mahali (Kolej Tunku Kurshiah Seremban, Negeri Sembilan); Lee Wei Ling (SMK Taman Melawati, Selangor), Nur Syuhadah Muhamad (SM Sains Tengku Muhammad Faris Petra, Kota Bharu, Kelantan), Lai Yin Kwin (SMK Tinggi Melaka, Melaka), Corinne Gunn Huey Min (SMK Taman Melawati, Selangor) om i Hu May Khei (SMK Convent, Taiping, Perak).

Ka disio, siam po kawagu sikul bobos tosonong nopo nga’ Kolej Islam Sultan Alam Shah, Klang, Selangor; Sekolah Berasrama Penuh Integrasi (SBPI) Gombak, Jalan Sungai Pusu, Gombak, Kuala Lumpur; Sekolah Tun Fatimah, Johor Bahru, Johor; Sekolah Menengah Sains Alam Shah, Kuala Lumpur; SBPI Rawang, Selangor; Sekolah Menengah Sains Muar, Johor; SBPI Temerloh, Pahang; SMK Infant Jesus Convent, Johor Bahru, Johor om Kolej Tunku Kurshiah Seremban, Negeri Sembilan.

Minoboros i Alimuddin do mantad di 406,420 calun sikul Komontirian Palajaran i mindikau do poporisaan dilo’ di toun nakatalib, soginumu’ do 364,046 (90.8 pihatus) nakalantoi nakaanu setifikit SPM nung poiradon nodi 347,443 (90.8) di 2008.

“Sundung do miagal pihotusan dilo’, nga’ haro kinoruhangon do calun soginumu’ 16,603. Gulampot nopo diti nga’ aadas miagal nogi’ di gulampot toun nokopogulu,” ka disio.

Minoboros isio do soginumu’ 199,155 (49.6 pihatus) calun lulus toinsanan mato palajaran di nanu nung poiradon di 181,419 (47.4) toun pogulu dilo’.

Ka disio, mantad tintob dilo’, soginumu’ do 68,131 (17 pihatus) calun nakalantoi nakaanu sokukuri’ do gred C montok toinsanan mato palajaran id SPM toun di nakatalib nung potopongon di 60,902 (15.9) di 2008.

“Gulampot diti nokopokito kinoinsawaton di osonong kopio. Poingkuro po, tintob calun di amu’ nakalantoi toi nakaanu gred G nokoinsasawat ilo’ nopo nga’ soginumu’ do 4,626 (1.15 pihatus) di toun 2009 nung potopongon di 2,589 (0.67) di 2008.

Minoboros i Alimuddin do soginumu’ 538 calun kikopomogunaan poinbida’ mogisusuai kokimaian minindikau poporisaan SPM 2009 nung poiradon nodi 481 calun di 2008, om mantad tintob dilo’, 251 (51.9 pihatus) calun nakalantoi nakaanu setifikit SPM nung poiradon di 208 (47.8) di 2008.

Ka disio, duo calun ohour tokito nakalantoi nakaanu apat A+, tolu A om apat A- mantad di 11 mato palajaran di nanu naamot songulun kawagu nakaanu do apat A+, tolu A om tolu A- mantad 10 mato palajaran di nindikau.

“Haro duo po calun i nokotoguang mogisusuai kokimaian nakalantoi nakaanu gulampot ‘cemerlang’ soira’ ngoduduo dilo’ nakaanu do walu’ A+, duo A mantad 10 mato palajaran di nanu,” ka disio.

Ka disio, gulampot do calun kakadayan om labus kakadayan nokopokito kinoinsawaton nung poiradon nodi toun pogulu dilo’, ilo’ nopo nga’ soginumu’ do 5,942 calun kakadayan om 1,243 (labus kakadayan) nakaanu ‘cemerlang’ montok toinsanan mato palajaran nung poiradon nodi 4,750 (kakadayan) om 989 (labus kakadayan) di 2008.

Minoboros isio do piwolitan pisuayan id pialatan calun kakadayan om labus kakadayan naanu pinopironit id sunduk gulampot pipiro mato palajaran tosuul ilo’ nopo nga’ Boros Inggiris, Sains om Pontudukan Moral.

Poingkuro po, ka di Alimuddin, pinggisaman montok popironit do piwolitan id pialatan kakadayan om labus kakadayan kiguno inggorisan po lolobi no montok mato palajaran Boros Melayu, Sejarah, Matematik om Palajaran Islam.

Ka disio, mimpau do Gred Pulampai Sikul, soginumu’ do 66 tinan sikul id bohogian Cemerlang, 278 (Baik), 1,654 (Memuaskan) om 143 (Berpotensi), nokopokito pinggisaman komontirian montok mongingkawas gulanmpot sikul nalantoi do popoindalan.

Minoboros isio do tintob susumikul i nolulus mato palajaran Boros Melayu om Boros Inggilis id poporisaan SPM toun di nakatalib nokoposurat kinoinsawaton nung poiradon di toun nokopogulu dilo’.

Ka disio, soginumu’ do 364,046 susumikul nolulus Boros Melayu id poporisaan toun di nakatalib nung potopongon di 347,443 di 2008 om 302,501 nolulus mato palajaran Boros Inggilis nung poiradon di 282,471 di toun nokopogulu dilo’.

Minoboros isio do mamaso koporintaan minggisom kumaa papabantug do Boros Melayu om monginggoris do Boros Inggilis mooi do gulampot ngoduduo mato palajaran dilo’ aanu mongingkawas.-Bernama