‘Ibu tunggal’ ounsikou nakaramit koponguhupan id ababayan Juara Rakyat

BEAUFORT: Songulun ‘ibu tunggal’ i Emilda Toman, 33, pinopolombus kounsikahan dau tu’ kopihondot diti wulan kotundunan id ababayan Juara Rakyat i pinaanjur do koporintaan, nakaanu isio do songinan walai tiiyonon montok paganakan dau.

“Ounsikou oku sabab nakaanu do walai iyonon miampai diti apat tanak ku,” ka di Emilda i haro duo tanak miapid kiumur 7 toun om duo tanak tondu’ kiumur do 13 om 14 toun, i pogulu diti poingiyon doid walai paganakan di tongotiagak sinowoon dau.

“Yoho’ nopo nga’ aiso’ karaja’ om i sinowoon ku nga’ nokoidu’ pogun, aiso’ no kopio koonu onuan ku do momonsoi walai,” ka di Emilda kawagu.

Rinubaan yau di maso pitabangan mamawaal do walai dau i pinoimpuun di Puru Parlimen Sipitang i Datuk Sapawi Ahmad om naampai po nogi’ di Puru Lintuhun Koundangan Pogun (Adun) Lumadan i Kamarlin Ombi, Lansanon Komogoton Rayat (PKR) Lumadan i Ahmad Mumin om i Luguan Komulakan Umno Sipitang i Zulhelmi Hasbi doid Kampung Karangan, di songkonihab.

Sinowoon di Emilda i Ahad Osman, nokoidu’ pogun pipiro tadau pogulu Tadau Raya di toun nakatalib soira’ nolondod di maso minonginsada’ id Bawang Karangan.

Lumansan po nogi’ i Emilda do osokodung yau gisom karamit koponguhupan kotundunan miagal do tongo’ ibu tunggal di suai montok monginggaan koinggoritan om gunoon sabaagi pabalanjaan di tanak dau do sumikul.

Naamot dino i Ponorikohon Biro Kotundunan Parlimen Sipitang i Muhanam Mujarto i nokotindapou doid pitabangan dilo’, pinopoilo do nokoilo no yolo’ di kobolingkahangan potoguang di Emilda dilo’ om minggisom montok koonuan dau do koponguhupan di poinpatut.

Naamot dino, id iso’ walai doid Kampung Hulu Karangan, songulun kawagu ibu tunggal nolohing i Saunah Warita, 90, minonongkounsikou kuminaa koporintaan mantad no do koponguhupan kousinan i naramit dau montok monilombus koposion miampai di tanak angkat tond’ dau, pointonod do kinopoimpuunan e-kasih.

“Kaanu oku do koponguhupan om nonuan do koporintaan RM300 potitikid wulan pointonod di toun nakatalib,” ka di Saunah.

Mantad no do koponguhupan kousinan dilo’, koboli yau do tubat om kapamalanja’ di tanak dau i kakal poinsikul id sikul mananga’.

Pinointalang di Saunah ilo’ di maso minamaramit kinotombuluyan di Sapawi om tinonudan kaampai no i Kamarlin, Ahmad Mumin, Muhanam om i Zulhelmi doid walai dau katalib pinitabangan kopihondot wulan Kotundunan do ababayan Juara Rakyat id kampung dilo’.

Tumanud di Saunah babaino’ diti osongulunan po yau do mongingiyon id walai dilo’, sabab i tanak dau nuhupan po nogi’ do koporintaan miniyon id asrama.

“Nung okon ko’ tiuhup do porinta’ diti, amu’ oku kopio koilo om hombo pogihuman do kaakan-akano’,” ka di Saunah.

Pogulu dilo’, io Sapawi di Kamarlin om tinonudan minongoi kakap di songulun tulun nolohing i Nona Duraman, 68, doid Kampung Karangan.

Id kinotombuluyan dilo’, lalansanon nokomoi pinapatahak do toluod tusin om id timpu di miagal pinaparamit do poruntukan om minonuhu’ do Biro Kotundunan Parlimen Sipitang do mongundar kinaraagan walai di tulun nolohing nokomoi.