Atag manaak pambalazan kumaa mongingia mongoput balajalan

 

GEORGE TOWN: Komontilian Balajalan mangatag montok manaak kapambalazan kumaa mongingia ngaavi i mongoput balajalan id nazatan Ijazah Sarjana om Ijazah Kedoktoran.

Montili dino Dr Maszlee Malik minoboos monoodo o komontilian pibaasan miampai Koupisan Kotoinaan Polinta (JPA) kogompit atag dino.

“Montok timpu tanau, maamaso tokou moguhud om miboos miampai boogizan JPA Ahansan kaanu zou nogi kotuhungan Huguan Montili Tun Dr Mahathir Mohamad kogompit atag diti,’ ka disido ontok minamason id lamai koponoimaan Tadau Mongingia Nazatan Kabangsaan 2019, id doiti di koniab.

Lamai dino pinoimagon di Huguan Montili Tun Dr Mahathir Mohamad. Minoboos isido minamagais o komontilian piipio pongkimamaan timpu uha-uha om tanau montok momouang vinasi kalaja ngaavi mongingia di sikul.

Minoboos i Maszlee montok pongkimamaan timpu di uha-uha i kotimpuun Vuhan Koiso gisom kohimpupuson toun diti, pinoposuang nuzudan o komontilian piipio ahal vookon dino kapanadaan audit Standard Kualiti Balajalan Malaysia Gelombang 2 (SKPMg2) pinotood.

Tumanud disido boogizan sikul monoodo nopo audit kendiri montok mongintutun kozo vinakas om hinomi dioho.

“Fasa kopongintangan om penilaian kendiri ukabon induvo sontoun ino nopo nga vuhan Koiso gisom Vuhan Kotohu (Fasa 1) om Vuhan Kavahu gisom Vuhan Koopod om iso (fasa 2) piagahon intohu poguhui diti. Sistem online tomoimo ukabon montok uhudon om pongintangan,” ka disido.

Minoboos isido montok ahal panamangan panaasan id timpu suti sikul, kotimpuun toun diti panamangan panaasan Sijil Pelajaran Malaysia (SPM) todoon id lalah duvo fasa ontok Vuhan Kavahu om Vuhan Koopod om Iso ontok timpu sikul.

Montok monuhuk kogunaan sumovohi mongingia sumuti, suti mogosusu om suti sumakit 28 tadau, minoboos isido ksakadai kiginumu RM35.2 lizong pinohuzung kumaa Koupisan Balajalan Pogun montok kaanu nodii sikul momoguno kotoinaan mongingia sumovohi.

Naamot dino, minoboos i Maszlee komontilian nga nokopongintutun kozo piipio pongkimamaan timpu tanau i popoompit ahal di hobi pointantu om momoguno koponoizukan mahik ikoton om kootulan di kivaa no haid, kouangan vinasi infrastruktur om infrastruktur ICT, monguang perjawatan miampai koponuangan sandad vinakas id sikul.

“Montok pongkimamaan timpu tanau vagu, sokuukuang no kozo todoon kohimpupuson toun diti, piipio pongkimamaan nouhud kaampai no monughan kobohingkangan mongingia asansagan humabus id saasabap no do piipio nontodonon gisom ontodonon dioho manaak pongintangan id suang hinimput balajalan.

“Kootulan kalaja standard koumohigan mongingia nga nopongo mongintong om tinodo id lahan saviavi, vookon pongkimamaan di noonuan pongintangan nopo nga Panamangan Insurans Mongingia i tonggungon poimponu do polinta,” ka disido.

Nokosoguhu id lamai dino, Huguan Potunud Balajalan Datuk Dr Amin Senin minomohuguan pambasaan tuminau. Bernama

 
By :
 
New Sabah Times