75 huguan paganakan nokotoimo poomit mogiigizon, popobuu uvang pivohitan TTS

 

KOTA KINABALU: Kiginumu 75 huguan paganakan mantad apat kampung mantad Kota Belud om Kota Marudu di koniab nokotoimo poomit mogiigizon om popobuu tana pivohitan toi ko id suang uvang Taman-Taman Sabah (TTS).

Sijil ningkokoton dino pinotunui di Montili Kotundaan Habus Kakadazan Sabah Datuk Ewon Benedick kuminaa huguan paganakan nokogompit mantad Kampung Kampung Lahanas, Kampung Lasau Podi om Kampung Bubuk id Kota Belud miampai Kampung Nalapak, Kota Marudu.

Minamason i Ewon id lamai dino minoboos kapanaakan poomit dino nopo nga iso ningkokoton kumaa uvang tanah adat komuniti id kampung nokogompit montok kaanu nodii izioho mogiigizon i tuutulus popobuu tana id suang uvang mivohit miampai TTS.

“Ontok Taman Kinabalu nokoimagon ontok di 55 toun nakatahib, otumbazaan zou mogiigizon id posoihi Gunung Kinabalu minanaak mogisusuvai sisimba tu izioho au nodii osondiaan sumuang uvang dino montok magasu, maganu sandad pias, papanau abaabazan kololoizan om popobuu pomutanaman. Koozuzuvo diti kopoimbuhai pioduan om kopogompit pionitan pisokodungan piahatan mogiigizon om TTS.

“Pinoiho zou kivaa 13 kampung kivaa ahal pioduan tana miampai TTS hoohobi no kozo ontok ponukuan pivohitan uvang Taman Kinabalu tinoodo ontok 1990an. Pointantu no do komuniti humansan koponguhanan kokomoi ahal dino,” ka disido.

Mantad dino, minoboos i Ewon, pongkimamaan TTS papalayat uvang taman dino miampai manaak poomit mogiigizon om popobuu dino nopo nga nokotunud suvai koi no pointantu no kapanaak kohuvaan kouhanan kumaa mogiigizon kampung nokogompit i tuutulus koponguhan kumaa ahal dino.

Mogiigizon kampung monoimo poompit dino kikahansanan momoguno potitikid kosivatan di kivaa montok popobuu uvang dioho montok popohuzung ikonomi om sandad tangangazan mazaa pomutanaman toi ko eko kotombuhuzan, ka disido. Bernama

 
By :
 
New Sabah Times