Projik Wokok Papar pikiikiro timpuunan toun tiso

 

PENAMPANG: Projik kapamansaian Wokok Papar pikiikiro otimpuunan solilinaid do kolimpuunon toun tiso’ katalib po karaja’ ponimpuunan kaampai koposodiaan pomowonsoi om teknikal i mamaso poindalanon babaino’ diti opongo id timpu onom wulan, ka di Montiri Kopotundaan Infrastruktur Sabah Datuk Peter Anthony.

Minoboros i Peter do komontirian disio nga’ mamaso nogi’ mindad ruputan poinpuli mantad koupisan om kotinanan poinggompit sandad posorili pogulu poindalanon karaja’ kapamansaian wokok dilo’.

Tumanud disio, kapamansaian Wokok Papar kiguno insikapan montok papatantu kogunaan pangaba waig oborisi korungod id watas Tisan Kotonobon kaampai Kota Kinabalu, Papar, Penampang, Inanam om Tuaran sabab no do pangaba waig id watas nokomoi muri kuri’.

“Komontirian minonuhu do kopoindalanan Wokok Papar wonsoiyon tosiisikap sabab sundung pia do haro Wokok Babagon om piipiro loji waig id posoosorili Tuaran om Beaufort, nga’, kakal amu korungod pangaba waig.

Nung kapamansaian Wokok Papar amu’ poindalanon (kotongoban) kobolingkahangan kokurian pangaba waig kotilombus, loolobi no mogiigiyon mumu gumu’ id Kota Kinabalu om watas posoosorili,” ka disio kumaa magaganu habar katalib pinopoungkayut tutumanud ponongkusan Kapamaramaian Tadau Waig Sompomogunan 2019 nayatan Sabah do hiti, di konihab.

Kokomoi kapamansaian wokok id Ulu Padas, Beaufort, ka di Peter, komontirian disio minggisom papatantu kapamansaian wokok dilo’ oinsikapan sabab okon nopo ko’ kapangaba waig nga nogi kopongimbulai ginoris lotirik montok kogunaan mogiigiyon id Tenom, Sipitang om Beaufort.-Bernama

 
By :
 
New Sabah Times