Puu Umno pinosoou momoguno buzuon di koontok montok poposogu kobohingkangan

SPITANG: Minoboos i Huguan Umno Boogizan Sipitang, i Datuk Sapawi Ahmad do ahal diho nopo nga montok papavasa haang tosikap do aanu.

“Gunoo o buzuon di koontok montok popobuzu kobohingkaangan di kivaa…mimang tokou do kobohingkaangan diho do aanu haang tosikpa om au kohuntan,” ka disido di ontok pinopoimagon pitimbungakan Laan Umno pointimung montok Zon Pantai 1, Pantai 2, Banting om Usuk do doiti di koniab.

Potindapou nogi doid pitimbungakan nokomoi i Huguan Kopoihaan Umno Sipitang, i Ahmad Bujang, Monunuat Umno Sipitang, i Alidin Mohamad, Huguan Puteri Umno Sipitang, i Maimunah Sidik, Timbang Huguan Koonduan Umno Sipitang, i Rokiah Abdullah, Timbang Huguan Komuhakan Umno Sipitang, i Matbali Musah.

Minoboos isido do potitikid kobohingkaangan di pobuzuon nopo nga pointantu onuan pomuginavaan om onuon o haang.

Poingkuo po nga pinoposoou i Sapawi do pointantu no o haang tosikap do obuihit papanaon nung puu paati nokomoi do momihi montok au momoguno kobuzuan di pinotounda.

Tumanud disido, pinopotounda o Umno do buzuon montok puu dino do popobuzu nunu noopo kobohingkaangan, honi no doid kobohingkaangan di otoguvang doid boogizan sunsud.

Ontok ponogi diho, Sapawi, isido ponogi i Huguan Kopoihaan Umno Sabah, pinopoiho do manaak pomuginavaan o Kopolintaan Barisan Nasional (BN) di totootopot doid abaabazan kotundaan, hobi no id habus kakadazan.

Minoboos isido do ogumu kopoobian no pinotounda montok manakadai monunda om popobuu do habus kakadazan.

“Kopolintaan BN nopo nga polinta di kivaa koimauan nga abaabazan kotundaan di poonjulon nopo nga tumanud kopoguhuanan,” ka vagu disido.

Tumanud disido, nunu noopo upalai di pinobuzu, hobi poguhu do intangan o kopoguhuanan dino.

Pinopoiho isido do haang diho nopo nga montok mongiho kozo do abaabazan kotundaan di pinaanjul do kahantoi pongumbanganan di totopot.

“Abaabazan kotundaan miaga do kopoonjulan infrastruktur, koumatan om susuvai po nopo nga poonjulon tumanud kopoguhuanan…au tokou poonjulon miampai kosusuka’ai di kaanu papasabap do kopoguhuanan kumaa do layat kobibi,” ka vagu disido.