Ababayan SHEILDS montok susumikul kiguno poonjuron po’ompus timpu

 

Di RIZALMI LIMAN

KENINGAU: Ababayan Ponontudukan Kopongilagan Dadah id nayatan guas, kosuul no kumaa susumikul kosuul kopio do poindalanon po’ompus timpu.

I Panakadai Montiri Kopotundaan Labus Kakadayan Sabah, Rasinin Koutis minoboros, ahal dilo’ sabab no do haro kogunaan di kopononsog soira’ kobolingkahangan dadah do babaino’ diti kotilombus kopogundoronok om kopotongob di tongo’ molohing, mongiingia’ om nogi’ toinsanan lansanon kaampai no id nayatan kokompungan nogi’ tongo’ mogiigiyon.

Ka disio, nosili tonggungan toinsanan puru mogiigiyon kaampai o molohing, mongiingia’ om kotinanan poinggompit do tumilombus mimparagat id kopoindalanan ababayan kopontudukan kopongilagan dilo’ mooi do koindai o sukod wagu mantad kopomogunaan sala’ dadah do timpu dumontol.

“Pinggisoman diti osuul montok momogompi’ do tulun hontolon di osonong do timpu dumontol om pasanganu toilaan do magada’ dadah,” ka disio.

Minoboros isio ontok pinopoimagon Kinopongolimpupusan Kiim Sayangi Hidup Elak Derita Selamanya (SHIELDS) Siri 3/2018 pinaanjur do Kotinanan Anti Dadah Kebangsaan (AADK) Watas Keningau id Kiim PULAKO, IPG Kampus Keningau do hiti di tadau Minggu’ katatalib.

Suai ko ilo’, minongunsikou nogi’ isio kumaa kinopongonjuran ababayan i po’ompus doid watas diti i kapaampai nogi’ do Upis Palajaran Watas Keningau, Upis Kolidasan Keningau, Longkod Kokurikulum Institut Palajaran Mongiingia’ (IPG) Keningau om Longkod Kokurikulum (Pusat Ko), Upis Palajaran om nogi’ tongo’ mongiingia’ sikul poinggompit.

Naamot dilo’ i Monorina’ Ababayan Azry Golbin Azmi pinopoilo do timpu toruhai diti papaanjur bohogian disio do Bingkil Kopongilagan Dadah kumaa tongo’ lalansanon id nayatan kampung kituduan papagaras do tonggungan puru mogigiyon id koponoibahan kobolingkahangan dadah id tikid kokompungan.

Ka disio ababayan dilo’ pikiikiro pohoroon do koompokon wulan diti miampai kotonudan kiikiro 100 lansanon kampung.

Id SHIELDS di tadau Minggu’ dilo’, 50 susumikul mantad limo sikul tuminanud id ababayan tolu tadau nokomoi. Tutumanud bobos tosonong montok kiim nopo dilo’ do bohogian kokusaian om koonduan nga’ io’ Zulkarnain Jais dii Nurfazira Yusip.

Nokotindapou nogi’ i Upisor Poinbida’ Dadah, Upis Palajaran Watas Keningau i Usrah Abdul Wahid.

 
By :
 
New Sabah Times