Musa hoovon kumaa SPRM manaak kointahangan

 

PUTRAJAYA: Bagas Vozoon Montili Sabah Tan Sri Musa Aman hoovon kumaa hongkod upis Suruhanjaya Panahaban Susuap Malaysia (SPRM), id doiti di koniab, kikotumbazaan manaak kointahangan kogompit totondos susuap ontok Pomihian Tagazo Ko-14 (PRU-14) nakatahib.

Isido i tinanud di luyal disido okito suminuang louting SPRm di jam ko 11.45 minsusuvab suminakai iso kulita Toyota Vellfire oitom.

Boogizan media tuminimung id doguvang hongkod upis SPRM mantad po di jam ko 9 minsusuvab montok mindad koikatan disido sundung tu id suang koozuzuvo asapou asam mantad po di jam ko 10.30 minsusuvab.

Musa i nogi Puu Dewan Koundangan Pogun (ADUN) Sungai Sibuga, nosogu minomoduan pogun diti ontok di ko 16 Vuhan Kohimo nakatahib montok papanau pongusapan id London.

Nosogu isido mahik id tana kinosusuvon ontok di ko 21 Vuhan Kavahu nakatahib montok papanau pongusapan sumusuut id iso hamin pongusapan misosondi id Subang Jaya.

Guminuhi i Musa id Kota Kinabalu, Sabah songkoniab montok tuminau sabaagi Adun Sungai Sibuga id doguvang Speaker, Datuk Syed Abas Syed Ali.

Tumanud luputan media, abaabazan tumau dino nopupusan di jam ko 3.33 minsosodopon om pinougadan disido tuminuhud mantad Gana Tutubpoon Kapal Sompomogunan Kota Kinabalu (KKIA) di jam ko 10 totuvong montok gumuhi kumaa Kuala Lumpur.

Ontok di Tadau Kohimo nakatahib, Kumoduvo Huguan Pesuruhjaya (Kalaja) SPRM, Datuk Seri Azam Baki pinopoiho boogizan disido au magab-agab maganu kointahangan bagas Vozoon Montili Sabah om papasaga disido mokianu pongusapan hobi kopoguhu poguhui monoodo kotontuan sumusuut.

Ontok di ko 23 Vuhan Kohimo nakatahib, upisol SPRM nokotindapou id nizonon di Musa id Sabah, nga au izioho kaanu sumuang tu aiso isido id daamin.

Kikotumbazaan isido kivaa kogompitan miampai koponoizukan SPRM kumaa Polosiden Parti Solidariti Tana Airku (Star), Datuk Dr Jeffrey Kitingan i m isokodung miampai Barisan Nasional (BN) id suang pongkimamaan monuidong polinta pogun ahalas PRU14.

Jeffery soizukon SPRM kogompit totondos minonoimo RM20 lizong kahapas PRU14 mantad boogizan nakatantu. Tumanud luputan media, Musa nga baino iumon do pulis kogompit totondos minogundonok kahasaan tavagat kumaa Yang di-Pertua Negeri Sabah id lamai tuminau di ko 10 Vuhan Kohimo nakatahib. Bernama

 
By :
 
New Sabah Times