Mogiigizon pokionuon poposoguhu koumohigan

KENINGAU: Mogiigizon id piipio uvang i nogompitan hizud pokionuon poposoguhu koumohigan dioho, om tomoimo mokinongou ponuuan do soosongian nopo do boogizan kikuasa miaga do Koupisan Bomba om Manampasi miampai tinimungan pulis.

Panakadai Montili Kotombuhuzan, Koubasanan om Sandad Posoihi Datuk Ellron Angin minoboos, iti mantad no koozuzuvo tavan i au natantu id piipio uvang kampung id suang uvang Toniini Sook i nontodonon do piipio kampung naahaman do vaig.

Ka disido, osianan kozo isido miampai onu i nantakan om mokianu layat id uvang dino kotoboi miampai koumbakan sandad i nantakan dino.

Ellron i nogi Puu Dewan Koundangan Pogun (Adun) Sook minoboos dino ontok tuminombuhui di nogompitan hizud id Kg. Kuala Puteh om Kg. Mempulut di Tadau Koiso.

Pinapabaagi nogi isido sakadai miaga do balang taakanon kumaa kiginumu 69 paganakan id duvo kampung dino.

Ontok tadau di miaga tuminombuhui nogi id Kg. Ambual, Kg. Dalit, Kg Kuala Biah i vookon dino nogompitan songian Bavang Sook nakahabai, di minsusuvab Tadau Koonom.

Poingampazat nogi Kumoduvo Upisol Uvang, George Kandavu, Upisol Kotundunan Uvang, Ali Hassan, Upisol Pitubungan Parlimen Pensiangan om Buuan Kobuuon Layat (PKR) Sook Charles Ikang.

Ontok timpu di miaga mamason isido layat mooi do tomoimo miingat-ingat ontok timpu umasam, om mongintong do tanak ngaavi dioho au mamaamain id tisan bavang montok koumohigan.

Iti saasabap no ka di Ellron, hizud i nantakan id Sook nokopogompit iso kiniopon di kavavagu diti id Kg. Binuow.

“I kiguno tokou mositi poposoguhu koumohigan, kada do tumaan id daamin nung antakan hizud tu ino osikap antakan. Mogium tampat di atampasi om akavas,” ka di Ellron.

Kiginumu do 9 motusaikol om kulita nohimbunan saasabap no do hizud id kampung dino om kiginumu do 100 susumikul nga nogompitan.

Minoboos i Ellron, sakadai sumusuut hoohobi no kozo kaganapan taakanon posikapon mimapai haang Upis Uvang Keningau. Naamot Upis Kotundunan nga papataak sakadai ontok Tadau Kotohu diti.

Ponikoon JKKK Kg. Mempulut, Francis Ampohol, minoboos monongkotohuod kozo id kosianan buuan tu au pinapahaid timpu montok monuhung dioho.