Pongindopuan kigatang RM200,000 montok pamaganti di nakahaid

TAMBUNAN: Kadai pongindopuan id Kampung Rompon i kigatang RM200,000 montok mamaganti kadai i kivaa no haid i noomuk om tumimpuun do gunoon vuhan tiiso.

Kouhanan i pinotounda do kopolintaan diti kapanaak kouhanan kumaa saviavi mongindapu kinoizonon i papadagang asil ngaavi pomutanaman, tuva-uva om asil nosuvan id piasn id pivohitan kampung dino.

Kadai iso nuzudan i kivaa vahu lot i poimbihiu id pivohitan Kampung rompon. Tambunan, talun alun Tambunan-Keningau nogonop dopuan, tangki vaig om pagavasan tinoodo di vuhan nakatahib.

Sakadai kapanadaan louting dino nopo nga mantad Komontilian Kotundaan Dahabus Kakadazan om Wilayah mazaa Sakadai Premis Gerai Pongindopuan i pinohuzung kumaa Komontilian Kotundaan Dahabus Kakadazan.

Kumoduvo Vozoon Montili Datuk Seri Panglima Joseph Pairin Kitingan, minoboos, kadai pongindopuan dino pinotounda montok mongindapu ngaavi toniini id dahabus kakadazan montok papanau pongindopuan miaga do dumagang asil nosuvan pias kilisin, asil pomutanaman om tuva-uva.

Isido i nogi Montili Kotundaan Dahabus Kakadazan minoboos, kapanadaan kadai dino nopo nga pongkimamaan kopolintaan montok popobuu pongindopuan mamasok id dahabus kakadazan.

“Miampai kivaa louting kavavagu dino pointantu no do kaanu manaak kouhanan okn nopo kumaa mongindapu nga nogi kumaa tutumombuhui i kiangkab momohi id kadai dino,” ka disido.

Minoboos isido dino kahapas minonoodo kotombuhuzan kuminaa louting kavavagu Kadai Gerai Pongindopuan Kampung Rompon, somok doiti, di minsosodopon Tadau Kohimo.

Nokotindapou nogi id kotombuhuzan dino, Upisol Uvang Tambunan Thomas Angor, Upisol Ekskutif Kounsol Uvang Tambunan Wolfred Maaruf Gontiu, Kumoduvo Upisol Uvang Kotundaan Thomas Logijin, Monunuat Pulitik kumaa Kumoduvo Huguan Montili Wilfred Jakil om Buuan Kobuuon Layat Tambunan Laiwon Dalus.

Minoboos isido, pongindopuan dino sinavaan kumaa mongindapu mamasok miampai siva i takavas montok tosiibo om mongunsub hobi ginumu mamasok mumpazat id pongindopuan.

Pairin i nogi Puu Dewan Koundangan Pogun (Adun) Tambuhan humansan tampat pongindopuan dino aanu momoguno poimponu do mongindapu mamasok.

“Ontok timpu mikot, kopolintaan nga mangatag montok momouang kouhanan miaga do pagavasan om lot tampat poizanan padsakazan id tisan alun talun id uvang diti montok kouhanan tuhun ginumuan,” ka disido.