Layat pinosoou mooi do au mokinongou abal di au otopot

TAWAU: Posoovon o layat mooi do au mokinongou abal di au otopot i popoiho do ontok Vuhan Kosizam mikot, boogizan Pakatan Rakyat i hinuguand i Monontuduk Parti PKR Datuk Seri Anwar Ibrahim maganu pomolintaan mantad Kopolintaan Barisan Nasional (BN).

Abal miaga dino tootopot nopo nga iso’ taka i patazadon do boogizan di aiso tonggungan miampai angkab montok popohomi hizab layat mooi do au monokodung kopomuanan kopolintaan BN i maamaso momolinta.

Montili Kotundaan Pomounan Datuk Dr Ewon Ebin minoboos dino ontok minamason kopomoiganan Mitingan Agung Tri Tounan ko 3 Parti Upko Boogizan Apas, id hamin nizonon di Huguan Boogizan parti Upko id doiho, Sylvester Taing.

Tumanud di Ewon, ahal kovohion kuasa pomolintaan do boogizan Pakatan Rakyat dino nopo nga iso i au dati adadi nogi kopolintaan BN babaino okito noindamaan avasi miampai kinoimbuhazan mogisusuvai lahan om ikoton i tinoodo monguhan kobohingkangan i notoguvang.

Ka disido, sundung tu BN au nakahantoi nakaanu kohobizan duvo mantad tohu undi miampai naaha id piipio pogun id Semenanjung kuminaa hongon Gugumaga ontok pomihian nakatahib, tuhun Malazu id doiho nokoguhi kopiuman om mimang papavasi hinomi dino montok miiso mahik id siibo parti Umno.

Mazaa kotumbazaan dioho, do Umno no i kaanu popiiso tuhun Malazu (tinau majoriti id pogun diti), mantad dino abal ngaavi di au noihaan katapatan i popoiho do kivaa buuan BN i tumindak kumaa Pakatan Rakyat montok kaanu nodii kovohion kuasa dino, au dati antakan, ka disido.

Id lamai dino, Ewon i nogi Naib Polosiden Upko nga mamason puu ngaavi parti id doiho mooi tuutulus manaak sokodung kumaa kopolintaan i momolinta montok kaanu kotihombusan kotundaan i togiot om potihombus.

Ka disido, sundung tu poinsuang sabaagi do tinau toniini nga tokou om parti Upko atahang kivaa tonggungan i kaanu nodii kopolintaan BN momolinta mahik kahapas pomihian nakatahib om tuutulus dino manakadai mogisusuvai toihaan tapatut kumaa kotundaan pogun.

Nokosoguhu dino, Ewon noovit di Huguan Boogizan UPKO Apas, tuminombuhui kuminaa kampung Dusun i nokotoguvang kobohingkangan pitubungan tumahib bavang Tawau poungadau kumaa kampung dino saasabap no do pinonutuban talun alun i kivaa no haid tu nokogompit miampai kapanadaan pomuhomihian id uvang dino.

Montok monguhan kobohingkangan dino, pinapasagan i Ewon sakadai kiginumu do RM16 ngoibu montok monuhung momongo kapanadaan iso sunsuzon sumoboong bavang Tawau pougadan kumaa kampung dino i todoon mogiigizon id lahan mogitatabang miampai balanja sondii.

Id lamai dino nogi kiginumu do 20 mogiigizon id doiho i hinuguan di Edwin Luin pinopotunui do foom kosuangan puu kavavagu kumaa parti UPKO kumaa di Ewon.

Nokotindapou nogi id lamai dino, Monunuat Pulitik Komontilian Japirin Sahadi miampai buuan ngaavi pulitik takavas kaampain no puu Tinimungan Komuhakan om Koonduan Parti Upko Apas, Tawau.