Kotongob kinoinsavatan ginumu nobongo’ i nontodonon mantad tampat pakalajaan i agangau

BANGI: Ginangau id tampat pakalajaan noihaan kozo kapanakadai kopoguhu kumaa kobohingkangan pokikinongou i noindadamaan id tinimungan layat pogun diti, ka di Montili Kohidasan Datuk Liow Tiong Lai.

Minoboos isido ginumu dioho i nokotoguvang kobohingkangan pokikionongou saasabap no do ginangau dino tuutulus pinopokito koinsavatan potitikid toun piagahon nokimai poinsandad toi ko nokimai pokikinongou mantad po kosusu.

Pinonoizukan Institut Kohidasan Ginumuan pinopokito do 424,000 mogiigizon id pogun diti noihaan nokotoguvang kobohingkangan nobongo saasabap no do ginangau id tampat pakalajaan i nontodonon kukumaa kotoguvang noindamaan ahaid kumaa tuni di topuod mantad koumatan miaga do misin om injin tangagazo.

“Kobohingkangan diti mositi onuan pongintangan tavagat om uhanon tosisikap tu nung antakan koumbakan id tuat tohingo i nontodonon mantad ginangau ino adadi kobohingkangan potihombus om au aanu do mongusap,” ka disido kuminaa magaganu abal kahapas pinopoimagon do kimpin “Jom Dengar” id Univositi Kabangsaan Malaysia (UKM) id doiti di koniab.

Minoboos i Liow kobohingkangan nga saasabap no do kasaavan i osiibo id tinimungan tampat pakalajaan toi ko pakalaja mongintong do 23 piatus no pakalaja i momoguno do koumatan panahob do pokikinongou.

Minoboos isido suvai ko momoguno koumatan panahob pokikinongou pongihaan kopoguhu nga aanu monoodo mazaa poniisan audiologi id 19 kilinik kohidasan om 33 hamin pongusapan kopolintaan id pototongkop pogun.

Suvai mantad dino, minoboos i Liow, kotoguvang oindamaan ahaid katahib vahu jam kumaa tuunizon kololoizan i opuod mazaa MP3, MP4, walkman, tolifaun piovit-ovit om id hongkod kololoizan nga kapanakadai kumaa kobohingkangan obongo.

“Mokinongou tuunizon kololoizan kavasa nga mositi kitimpu. Komuhakan ngaavi mositi mongintong tavavagat kobohigkangan diti nung au mimang atagakan do pokikinongou,” ka disido.

Id suang kobuuon suvai, Liow i nogi Huguan Komuhakan MCA au minonugut poingonop nung misokodung isido miamapai di Naib Polosiden MCA Datuk Ong Tee Keat montok mokipihi kalaja takavas id suang parti dino ontok pomihian Vuhan Koopod.

“Pohogoson o puu parti i papatantu… toi ko dati popoboos zou kokomoi dino ahapas mitingan nazatan boogizan parti,” ka disido.

Ontok Tadau Kotohu nakatahib, pinopoboos i Liow do au papataan kalaja disido sabaagi Huguan Komuhakan ontok pomihian timpu diti di sambahik dino mingkakat montok kalaja di hobi kinavas.