Toun 2011 kahantoi kaganapan sondii kohobusan daging

KOTA KINABALU: Datuk Yahya Hussin otumbazaan ontok toun 2011 pogun diti kaanu humantoi ningkokoton kogunaan sondii montok kohobusan asil daging pomutazaman miaga do kambing om sapi montok kapadagangan kinoizonon.

Kumoduvo Vozoon Montili dino otumbazaan tumimpuun toun dino kopolintaan tumimpuun monguang balanja mongudal kaganapan taakanon mantad daging om tenusu hoohobi no kozo mantad Australia om New Zealand i nokoikot piipio billion linggit sontoun.

ìMongkimamaa nogi tokou montok mimbuhai pogun papahabus daging om tenusu montok sapi om kambing montok udalon,î ka disido.

Minoboos isido kuminaa magaganu abal kahapas tuminombuhui kalaja id Projik Pomogompizan Kambing Jambo Menggatal, di koniab.

Nokotindapou nogi i Potunud Koupisan Tazam om Pomounan Ternak, Haji Awang Sahak Ag Salleh.

Yahya i nogi Montili Ponginsadaan om Pomounan Taakanon minoboos, saasabap no do nangangazan toihaan bibit om kambing pobibiton id pototongkop pogun noindamaan nokoinsavat, tangangazan pomounan dino montok momogonop kopokionuan daging om tenusu montok kapadagangan kinoizonon nopo nga akavas.

Tumanu disido, babaino diti ginumu tanak kambing i kosusu om sapi id pomutanaman projik pototongkop pogun nokoikot hobi 2,000 tinan sombuhan.

Om sabaagi do pomitanan ka disido Projik Pomutazaman Kambing Jambo, Menggatal nopo kaanu papahabus hobi 40 tinan tanak kambing sombuhan.

ìPomutazaman diti nopo nga pomitanan pomogompizan asil tanak kambing i nakahantoi id siibo panamangan JHPT,î ka disido.

Kopiondot dino, otumbazaan isido pomounan pomutazaman kinoizonon okon nopo mositi do tuutulus pobuuon, nga nogi kaanu popoimbuhai momutazam i kahantoi om kaanu kobuu.

Minanaak isido kahansanan i takavas kumaa JPHT montok mongintong pomounan pomutazaman id pogun diti tuutulus kahantoi hizab dino ontok tohu toun mikot.

Poguhui diti, tuminombuhui i Yahya pomutazaman om pobibitan putik id Kionsom minoboos do projik pomutazaman putik mositi momiit projik pomutazaman manuk i babaino nakaanu guhi kumaa asil pogun.

Ka disido, mantad po piipio toun nakatahib pomounan pomutazaman manuk okon nopo pinapahabus kinavas kogunaan sondii i takavas kumaa momutazam miampai nokotuhuk kogunaan kinoizonon, nga asil tontohu i udalon kaampai no Brunei om Semenanjung.

ìIntangan do kopolintaan saviavi projik pomutanaman diti kapahabus guhi okon nopo kumaa momutazam nga nogi dioho kaanu monuhung monguang balanja momohi kaganapan taakanon mantad dahabus pogun,î ka disido.

Naamot dino, minoboos isido au kapasagaan mongudal sada kigatang takavas i kivaa id pitakasan pogun diti kiguno tu ino mintamong tungkus pogun mantad onuon do pogun dahabus.

Tumanud disido, saasabap no do sada dino kivaa id pogun diti, saviavi kogompit kapanadaan projik om koponoizukan kogompit sada kigatang takavas dino mositi todoon id pogun diti.

ìMongontok tokou haang undang-undang kumaa boogizan i humasa momoguno poomit mongudal dioho,î ka disido.