Kumuang ginazo pananaman paai potitikid toun: Yahya

SANDAKAN: Ginazo uvang pananaman paai id Sabah kumuang potitikid toun tumanud nosuat om luputan ginazo kohobusan tanom pomutanaman daasom timpu 2003 gisom 2006.

Kumoduvo Vozoon Montili Datuk Seri Yahya Hussin minoboos ontok toun 2003, ginumu ginazo uvang montok pananaman paai nopo nga 41,271 hektar, tinanud do 40,822 hektar (2004), 39,631 hektar (2005) om ontok toun 2006 pinopokito kinotuunan uvang kiginazo 60 hektar vagu.

“Nung kohuzungan miaga diti otihombus, pogudizaan dino nopo nga nombo ikoton pomounan paai pogun. Kahantoi nangku hizab montok dumampot kogunaan sondii kiginumu do 60 piatus om kaganapan vagas id suang pogun kahantoi,” ka disido.

Minamason id lamai kopomoiganan mitingan tounan Koupisan Pomutanaman Sabah id doiti di koniab, Yahya i nogi Montili Pomutanaman om Pomounan Taakanon minoboos uvang kosudong montok pomutanaman id Sabah nopo nga 2.12 lizong hektar miampai 322,601 hektar mantad dino kosudong montok tanom paai.

Ka disido tumanud luputan tounan 2006, mantad 1,411,220 hektar ginazo tanom i pinobuu montok pomutanaman, 39,571 hektar mantad dino popoompit tanom paai.

Ontok po nogi dino, minoboos i Yahya mimang isido mooi Koupisan Pomutanaman Sabah papabaa vagu pongkimamaan popobuu pomounan paai id suang pogun.

Ka disido abaabazan i kivaa no haid mositi onuan pongintangan, vookon dino kotoinaan ponontudukan mobubuvat, pomogunaan bibit tavasi, abaabazan mekanisme, abaabazan kumaa 10 tan metrik om poguhudan momimiumbak miiso.

“Otumbazaan zou, nung abaabazan diti todoon miampai kahantoi, ino kapanaak kovosian okon nopo kumaa Koupisan Pomutanaman nga nogi kumaa mogiigizon hoohobi no kozo tinimungan mobubuvat id lahan saviavi dino,” ka disido.