Ihoon kozo do aiso KIRT kobibi mantad suang nuhudan: Bobbey

NABAWAN: Mokianu i Panakadai Monntili Pomutanaman om Pomounan Taakanon Sabah, i Datuk Bobbey Suan do buuan ngaavi mogigizon mooi do manaak sokodung kumaa doid Koupisan Perangkaan montok mongiho kozo koposuatan Huguan Suang Hamin Noindamaan Mosikin (KIRT) do kaanu koponuhuk umbanganon.

Iti nopo ka disido nga papavasa noopo dioho di totootopot kosudong do posuangon sabaagi KIRT, sabaagi mononoimo koumatan toi abaabazan di pinotounda do kopolintaan.

“Ihoon no kozo do totootopot izioho kosudong om au atatak doid nuhudan di kaandak do boogizan di kogomit montok popohumis do haang kotihombusan,” ka disido di ontok pinopohombus pason Kalamazan Kaamatan Nazatan Uvang Uvang Nabawan id hintuun togumu guno do doiti di koniab.

Potindapou nogi doid kalamazan nokomoi i Puu Parlimen Pensiangan, i Tan Sri Joseph Kurup, Upisol Uvang Uvang Nabawan, i Bubudan O.T. majalu, Monunuat Pulitik id Koupisan Vovozoon Montili, i Zaiton OKK Anik, Huguan Uvang Nabawan, i OKK Sayau Tangkap, bagas Puu Parlimen Pensiangan, Datuk Taimin Lumaing, bagas Adun Nabawan, i Ulin Datuk Pamiang, huguan ngaavi koupisan kopolintaan om buuan ngaavi tuhun mogigizon.

Bobbey, i ponogi Puu Hintuun Koundangan Pogun (Adun) Nabawan, minoboos do ontok timpu nakatahib, kivaa paganakan di kosudong nga natatak om sabahik dino do izioho i kivaa koimauan do nokosuat. Ka disido, naantakan iti tu okudi pisokodungan om kogompitan do buuan ngaavi mogigizon songian do popobuzu nuhudan ngaan kumaa id Upis Uvang om koupisan ngaavi di kogompit.

Mantad diho ka disido, kabaahan do buuan ngaavi mogigizon id ahal diti nopo nga kiguno kozo montok mongivad ahal miaga diho do ouhit. “Ivado iho ada do ouhit tu nung aantakan vagu iho, adadi patandasan o hahansanon ngaavi layat id uvang om tomoimo pahasaon maka ko i kitonggungan nopo nga id nazatan sunsud i buuan ngaavi do mogigizon,” ka disido.

Id pason di Bobbey, pinopoiho nogi isido do kotundaan do mikot id uvang diti nopo nga kopogompit do agropolitan montok popoingkavas ningkokoton ikonomi do layat id uvang diti.

Kokomoi miampai kapanaandakan Kalamazan Tadau Kaamatan, minoboos i Bobbey do iho nopo nga okon noopo ko abaabazan ponongkotohuadan asil paai om manaandak kinahantazan do mobubuvat nga iho nga sabaagi nogi produk kotombuhuzan om kapanaak kumaa doid kotundaan ikonomi kotombuhuzan. Minoboos isido do pogisusuvazan koubasanan di pokitanan id kapanaandakan Lamai Kaamatan nopo nga koponokodung kumaa doid kotundaan kotombuhuzan di sabaagi iho mantad ‘halatuju’ do kopolintaan, suvai ko kaganaan pomutanaman om panadaan.

Ka disido, Kalamazan Kaamatan nga manaak nogi kosivatan kumaa doid tuhun mobubuvat do popokito asil pomutanaman dioho. Suvai diho ka disido, popopobuu kinuama hongon nga kikosivatan nogi do popokito asil kinuama hongon maza huhusap pokitanan om dagang nung onuan nodo kosivaan om pootoundaon o husap pokitanan kumaa dioho.

Di poguhui diho, tinoimo o kinoikatan di Bobbey miampai koubasan doun tinau Murut om Lundayeh , maza sazai koubasanan nokomoi. Kalamazan Kaamatan nazatan uvang diti nga pinosindak nogi miampai do kosohimbaan koubasanan potitikid tinau id uvang diti.