Juragan tinaan id kiis padau nokopilumpak nakasabap songuhun tanak nopujulan kiniopon

 

Di NAZRINI BADARUN nazrini@newsabahtimes.com.my

SEMPORNA: Songuhun juragat padau tutumombuhui tinaan reman sohinaid apat tadau, tuminimpuun di koniab montok manakadai ponoizukan kiis kinohigaganan padau id hivang daat Lolokiton Semporna, di tadau Kotohu.

Minoboos i Huguan Pulis Uvang, Supt Peter Umbuas, do natantaman dino i kiumul 24 toun tinaan montok ponontohan id siibo Seksyen 304 A Kanun Koundosoan di kahapas kinaantakan nokomoi, i nakasabap kinopojulan kiniopon.

Id kinaantakan di kiikila jaam ko 3.10 minsosodop diho, songuhun dazanak kusai nopujulan kiniopon di kahasa padau toidau padasakazan sinakazon tohu tuhun suvai nokogompit id kinohigaganan miampai padau tutumombuhui minogovit 10 layat China.

Munggui di nopujulan kiniopon nointutunan sabaagi do i Muhammad Arhidar Abdullah, 10, mantad Kampung Samar-Samar, Pulau Bum-Bum, i tinan dino nokito do mogiigizon kampung di tohu jaam kahapas kinaantakan.

Naamot do juragan padau padsakazan tuhun ginumuan kiumul 41 toun nosinduahan kozo om duvo po vagu kusai suvai tososondii kiumul 12 om 24 toun aiso ingkukuo.

Kinaantakan diho kikotumbazaan do naantakan di ontok o padau tutumombuhui i minogovit himo kusai om himo koonduan layat China mantad ponong Pulau Pataking, pakaazan kumaa kakadazan Semporna, nokolumpak miampai padau padsakazan nokomoi.

Tumanud di Peter, asil pinonoizukan kohimpupuun, noihaan i natantaman do au nokokito padau padsakazan i minikot mantad ponong vana duminaapas id doguhu do padau disido tu nobulalau do tadau mantad ponong vanan.

“Noihaan noopo o padau padsakazan dino id sinodu kiikila himo meter mantad padau tutumombuhui poguhui duuduvo dino nokopilumpak,” ka disido.

Binuzu kinaantakan diho, songuhun munggui nopujulan kiniopon, songuhun noindamaan nosinduahan om duvo natampasi id sakai do padau padsakazan, naamot do savi avi tutumombuhui id padau tutumombuhui aiso do ingkuukuo.

 
By : NAZRINI BADARUN
 
New Sabah Times