Mogiigizon id Kudat pinokianu manaak sokodung kumaa boogizan PDRM

 

Di MARUTIN ANSIUNG marutin@newsabahtimes.com.my

KUDAT: Tuhun ginumuan, hobi no do buuan ngaavi mogiigizon id nazatan sunsud, kaampai no kotinanan ngaavu ugama, sinuu mooi do manaak sokodung kumaa do Pulis Diraja Malaysia (PDRM) montok manamong koumohigan om popotindooi do kotoonongan tuhun ginumuan id uvang diti.

Minoboos i Huguan Pulis Uvang Kudat, DSP Douglas Nyeging Taong, do kiguno kozo iti tu buuan ngaavi mogiigizon id nazatan sunsud nopo nga nadadi mato om tohingo do PDRM.

Ka disido, upisol om puu pulis au kaanu mangangkub sangavian pangan toi kinoizonon tu ginumu dino nopo nga poinggontob, nga potitikid kampung toi ko kinoizonon id pososoihi uvang diti kivaa mogiigizon di kaanu manaak sokodung om popobuzu kopoihaan kumaa boogizan pulis sokio nung kivaa kaantakan ahal ngaavi di kosivavo.

“Sokodung do mogiigizon doid kopobuzuan kopoihaan kumaa pulis nopo nga okon noopo ko papavasa do pulis maganu haang nga nogi insan insan kaanu iho manahob kahasaan,” ka disido di ontok minanaak kointahangan toniibo id kotombuhuzan pihumaagan om abaabazan piintutunan sangavian do Jemaah Mosogit Jamek Kampung Pengaraban, somok doiti di tadau Kohimo nakatahib.

Id abaabazan nokomoi, pinopobuzu i Douglas do kointahangan kokomoi ahal ngaavi koumohigan om panahoban kahasaan tavagat. Avasi ponoimaan do sangavian Puu Komiti Mosogit do abaabazan diti om nogi mogiigizon ngaavi di nokotindapou.

Tumanud di Douglas, abaabazan diho nopo nga sabaagi iso ponginsomokan do PDRM montok monginsomok do mogiigizon nosizun boogizan id uvang diti.

Monongkotohuod nogi isido kumaa doid savi avi AJK Mogosit nokomoi tu pinapavasa disido pinopoimpau hapap id mosogit nokomoi.

 
By : Di MARUTIN ANSIUNG
 
New Sabah Times