|
19th September, 2012
KENINGAU: Ahansan i Kumoduvo Vozoon Montili Sabah, Tan Sri Joseph Pairin Kitingan doid kopolintaan Pisompuuvan do popohuzung kopoobian di hobi ginazo montok kotundaan infrastruktur habus kakadazan Sabah id bajet pomogunan diti (belanjawan Negara) 2013 i pisosoomo pobooson di Huguan Montili Datuk Seri Najib Tun Razak ontok ko 28 vuhan Kosizam diti.
Minoboos isido do iti nopo nga sabap kakaal kivaa uvang id habus kakadazan i mokianu ponundunan mantad kopolintaan, hobi no mantad ahal koumatan infrastruktur toi talun alun montok popouhan do mogiigizon kampung papadagang asil pomutanaman dioho.
“Izioho i papapanau tapanazan pomutanaman om pomuazaman, mositi onuan pomuginavaan montok papavasa do tinimungan diti kaanu koonuan takavas oikot toun 2020,” ka disido.
Pairin, isido ponogi i Montili Kotundaan Infrastruktur pogun Sabah , minoboos diti kuminaa doid magaganu abal di ontok tuubungo id abaabazan panaandakan Hari Raya Aidilfitri Parlimen Keningau, do doiti di songkoniab.
Ka disido, tomoimo o kopolintaan Pisompuuvan do manaak kopoguhuanan kumaa doid kotundaan habus kakadazan id pogun Sabah diti, mipahud miampai konsep 1Malaysia i popoguhu kounalan do layat, kaampai no i poingizon id habus kakadazan.
“Mantad diho, mositi o layat mamagatang hizab om kaandak do kopolintaan i kumaandak mombii kotundaan di poisompuu, insan insane kapanakadai popoingkavas ningkokoton koposizon dioho,” ka disido.
|
