|
19th September, 2012
TAWAU: Monunuat Hongkod Sabah Datuk Abu Bakar Hassan mamason saviavi agensi hongkod om pakalaja id siibo agensi dino id Sabah mooi tuutulus popogiot om papantod pionitan tavasi miampai agensi om pakalaja polinta pogun.
Minoboos isido pionitan tavasi om pisokodungan togiot piahatan agensi hongkod miampai agensi polinta pogun kiguno kozo montok mongintong kapanadaan saviavi ikoton om abaabazan polinta miampai sistom kopointahangan dino kapanau miampai avasi.
“Aiso agensi di kaanu pakalaja misosondi. Mositi misokodung tokou miampai agensi ngavi suvai mantad po toi piahatan agensi hongkod toi ko miampai agensi polinta pogun. Pioniton no pionitan tavasi miampai polinta pogun. Pionitan miaga diti kiguno kozo.
“Kada poimbuhazo toi ko popogompit ahal di tasabi. Kada poimbuhazo nuununu pionduan. Monoodo kointutunan di tavasi miampai agensi polinta pogun. Tokou (agensi polinta) id doiti montok manaak kotoinaan om papatantu kotundaan pogun Sabah,” ka disido.
Minoboos Abu Bakar dino ontok minamason id doguvang ngotusan huguan om pakalaja agensi kotoinaan polinta hongkod id Tawau id Auditorium Pambasaan Buuk Pogun Laan Sabah kopiondot lamai Pitimungan Minsusuvab Puu Kotoinaan Polinta Hongkod id doiti di koniab.
Kivaa kuang hobi 90,000 pakalaja polinta hongkod id Sabah om kuang hobi 5,000 mantad dino pakalaja id Tawau.
Tumanud di Abu Bakar songian saviavi agensi polinta om pogun misokodung togiigiot id suang kapanadaan ikoton om abaabazan polinta, kovosian touvi no dino aanu do layat au mongintong id nombo izioho id po toi kakadazan toi ko dahabus kakadazan.
Mokianu nogi i Abu Bakar saviavi puu kotoinaan polinta mooi do mamalati miampai tavavasi saviavi ikoton om abaabazan kohobusan di pinointutun polinta tu miampai pilotian miaga diti no i kaanu nodii izioho monoodo tonggungan miampai tavasi.
Ka disido pakalaja polinta au apatut monoodo totondos sondii kokomoi ikoton ngavi polinta om maganu haang tumanud kaandak dioho tu nung antakan dino hizab tootopot ikoton dino au kadampot om ekspektasi layat vagu au aanu monuhuk.
Pinoposoou nogi i Abu Bakar agensi hongkod mooi popogompit layat nazatan sunsud om boogizan kipotutan di suang kalaja koponoinaan om monoodo kotontuan kumaa nuununu projik toi ko abaabazan poguhui todoon montok mongintong abaabazan om projik kadampot ikoton.
|
