|
|
|
Sapawi nintangan di Potunud Kointahangan Sabah Almain Ajirul pinopotunui do sijil kaampazatan kuminaan hahansanon Telekom Neil Edine id lamai dino.
|
13th September, 2012
KOTA KINABALU: Huguan Kointahangan Umno Sabah Datuk Sapawi Ahmad mokianu dopuu Umno id pogun diti poposoguhu disiplin om modihin koubasanan papaatu mantad douvi hoohobi nokozo id suang tumoguvang pomihian ko-13.
Minoboos isido koubasanan miaga dino kopomiumbak kosivatan mokikipihi Barisan Nasional (BN) montok humantoi.
“Pointantuno do, kaakun tokou om monuu kozo kopoingatan di Kumoduvo Huguan Montili montok maganu haang tapatut dino kumaa dioho i momoduung toi ko papaatu mantad douvi ontok tokou kotoguvang koozuzuvo tumoguvang pomihian tagazo,” ka disido kuminaa magaganu abal id doiti songkoniab.
Sapawi nasamaanan kahapas tuminindapou do lamai ponutuban abaabazan Kembara Merdeka Jalur Gemilang nazatan pogun Sabah 2012, naazu Koupisan Kointahangan Sabah id doiti totuvong songkoniab. Nokotindapou nogi Potunud Koupisan Kointahangan Sabah Alamin Ajirul.
Tadau Minggu nakatahib, Kumoduvo Huguan Montili i nogi Kumoduvo Polosiden Umno Tan Sri Muhyiddin Yassin minanaak kopoingatan puu toi ko buuan Umno i noihaan do sabotaj mokikipihi poiduon mantad parti.
Minoboos i Sapawi sabaagi iso parti di tagazo om tapantod, Umno momoguno iso disiplin miampai katamaan montok maganu haang montok timpu dumonto pogun om Umno sabaagi tuhang hikud polinta BN.
Nokosoguhu dino, id suang pason disdio, Sapawi i nogi Exco Kointahangan pogun minoboos abaabazan Kembara Merdeka Jalur Gemilang nopo nga iso impoon toi ko vazaan montok poposindak guminavo pogun id suang tinimungan layat mogisusuvai tinau.
“Abaabazan koikulaho pihumaagan om pilotian nopo nga impoon montok popoimbuhai mogiigizon di miiso om saasabap no dino, miguuguhi no tokou monoodo abaabazan diti (Kembara Merdeka Jalur Gemilang) montok monoodo dino,” ka disido.
|
