|
23rd August, 2012
TAMPARULI: Mokianu o Koisaan Kotundunan om Balajalan Kadazandusun Murut Sabah (PEKADIN) mooi do hobi ginumu tadika Kadazandusun Murut (KDM) i papanaon do swasta do ukabon id pogun Sabah diti.
Ontok minonoodo pongunsuban diho, minoboos i Poniikon Biro Balajalan om Pamantodan Balajalan dino, i Mojuntin Ebin do haang diho nopo nga mipahud miampai pinggisoman do Komontilian Balajalan popointutun pambalajalan boos Kadazandusun mantad po di toun 1997, id sikul pangan tosiibo om id sikul pangan takavas di toun 2006 id pogun Sabah diti.
Naamot minanaak poombitanan kinahantazan do projik ponimpuunan Tadika Ceria id Kampung Monggis, Tenghilan, somok doiti i momoguno boos Kadazandusun sabaagi boos pionitan, ahansan isido do kotoinaan Tadika KDM swanta miaga diho do pahaabos kumaa id uvang suvai montok mamantod ponguasaan boos nokomoi id tatanga do susumul tongomuhok umul.
“Izikoi id Pekadin kokito do pongukaban hobi ginumu tadika KDM swasta sabaagi iso lahan di kosudong do onuan ponimbangan. Kogompitan do boogizan swasta niopo nga gunoon kozo tu ogumu mokiki’ia sikul pangan tosiibo, hobi no do susumikul mantad tatanga do tuhun KDM i kakaal omungkang doid boos nokomoi,” ka disido kuminaa doid Bernama, do doiti di koniab.
Maza pinggisoman diho, otumbazaan isido do kaanu iho manakadai om mongiho kozo do boos Kadazandusun au atagak otohon timpu.
Ahansan nogi i Mojuntin do mooi hobi ginumu tinimungan intelek KDM monoodo buuk akademik sabaagi bakaang basaon di po’uangon montok susumikul di maganu panaasan mato balajalan id boos nokomoi, id nazatan sikul pangan takavas.
Pinggisoman diho ka disido nopo nga kaanu mongiho kozo do kotihombusan pambalajalan boos Kadazandusun gisom id nazatan univositi, insan insan popoinsavat boos nokomoi sabaagi boos toihaan binalajalan om adadi vookon pihi sabaagi mato balajalan.
Avasi nogi ponoimaan do Pekadin pinusou do Komontilian Balajalan minanaak ‘titiu totomou’ kuminaa doid pongia’an boos kadazandusun id nazatan sikul pangan tosiibo om pangan takavas id Sabah, ka disido.
|
