|
23rd August, 2012
SANDAKAN: Minoboos i Montili Komuhakan om Sipoot pogun Sabah, Datuk Peter Pang En Yin ounsikou kozo isido miampai sunduvan do tuhun mogiigizon nosizun tinau om ugama, ontok potitikid oikot timpu kalamazan, pointantu no pongozuvan do abaabazan hamin ngaavi poingukab do osindak miampai kotindapaan do tahap di noikot kozo ginumu.
Minoboos isido do izioho i tumindapou nga au ihoon, mohoing toi ko tongomuhok tu montok tuhun mogiigizon do pomogunan Malaysia diti, nunu i hobi kiguno nopo nga kaanu manaandak do kalamazan miaga do Hari Raya Aidilfitri miampai songovian.
Ka disido, kohobizanan do pomogunan diti nopo nga popokito pionitan pihumaagan di tapantod, insan insan popogiot po vagu pikagosan pihumaagan id piahatan do buuan om layat miaga di kaandakan id konsep 1Malaysia.
“Sinindak hamin poingukab Aidilfitri di ozuvon, popobuzu songkuo giniot pionitan dotokou sabaagi layat i mantad mogisuusuvai kotulunan om ugama. Sunduvan diti apagau kozo kivaa id sasatanga pomogunan.
“Mantad diho, kanou no umohigai o kotoonongan tinau di piumonon tokou baino diti montok kounalan do sinakagon mikot,” ka disido.
Noboos di Pang iti di ontok pinopohombus pason id Abaabazan Hari Raya Aidilfitri miampai di Mohoingon Tagazo Pogun Sabah, TYT Tun Haji Juhar Mahiruddin om sinavaan, i Toh Puan Hajah Norlidah RM Jasni, id Sikul Kebangsaan (SK) Melanta Jaya, Lahan Bokara, do doiti di koniab.
Puu Hintuun Koundangan Pogun (Adun) Karamunting om nogi Poniikon Puu Kotinanan Kosan nokomoi nga pinopobuzu nogi pamagatangan takavas om kotohuadan doid kinotindapaan do TYT id lamai i no’uangan vagu kinataandako miampai kinoikatan dioho ngoduvo.
Ka vagu di Pang, tuduvan do lamai diho do pinaanjul nopo nga montok tuhun mogiigizon songovian montok manaandak kalamazan insan sontoun, insan insan koponokodung kumaa doid pisompuuvan do layat miampai songovian dino.
“Miampai kivaa do kalamazan di taandakon dotokou di baino diti, kahansanan do kaanu popoingkavas koubasanan mogipapantang doid tinau tiso om tiso. Om kumaandak nogi tokou do koubasanan di ahaid no diti do kotihombus adadi ubasanon sundung tu pogisusuvazan doid dotokou.
“Nga i hobi kiguno kozo nopo nga hinuduk kumaa 1Sabah om 1Malaysia do kotihombus poimpantod,” ka disido.
Ontok ponogi diho, hobi 300 dazanak aiso mohoing mantad posoihi uvang nokomoi do nakaambit usin Raya i pinataan do Toh Puan Hajah Norlidah.
Hiniis nogi o tombuhui ngaavi miampai mogisuusuvai kosohimbaan di kagazat miaga do hozou ngaavi om sazau koubasanan, kaampai no pokitanan silap mato.
Potindapou nogi doid lamai diho i Panakadai Montili Kotundaan Habus Kakadazan, Datuk Sairi Karno, Huguan Umno Boogizan Sandakan i Tan Sri Ampong Puyon, Adun Elopura i Au Kam Wah, Adun Sekong i Datuk Samsudin Yahya, Puu Parlimen Batu Sapi i Datin Linda Tsen Thau Lin om i Polosidin Kounsol Kakadazan Sandakan i Datuk James Wong om nogi buuan ngaavi komponen Barisan Nasional (BN) mantad pototongkop pogun Sabah, kaampai no buuan ngaavi mogiigizon posoihi.
|
