|
|
|
Musliati om savo dosido maso monompuan do monunuat ngaavi media massa om elektronik i nokotindapou doid lamai hamin poingukab dosido.
|
23rd August, 2012
MENGGATAL: Kosokodung o Tinimungan Puteri Umno ponoihian mahik gontob himo piatus royalty tumau di pabalazon kumaa Sabah.
Minoboos i Huguan dino, Musliati Moslimin do apatut o kopolintaan mombii mahik gontob pambalazan royalty tumau diho montok kounalan do layat Sabah miampai songovian.
“Miampai doun sondii om sabaagi layat Sabah, kikopiumanan zou do apatut o kopolintaan mombii mahik gontob pambalazan royalty tumau diho.
“Noikot no timpu dino do onuan iho pomuginavaan totootopot tu pambalazan himo piatus nopo nga piniumpongozan poguhu i minaan hobi 40 toun nakatahib. Baino timpu nodii vagu dadi mositi iho do onuan pomuginavaan totootopot.
“Iti okon ko kaandak iso tuhun nga kaandakan songovian layat Sabah. Poingkuo po nga pahansanon tokou kumaa doid buuan savat do kopolintaan montok monoodo koputusan. Pohogoson o koputusan diho ‘menang-menang’ iho nopo nga manaak kavasian kumaa mogiigizon Sabah om nogi kopolintaan Malaysia miampai songovian,” ka dosido.
Noboos dosido iti kuminaa doid monunuat abal di ontok Abaabazan Hamin Poingukab dosido id Taman Flamingo, Lahan Tuaran, somok doiti di koniab.
Pinokianu i Musliati do mongomi boos di Vozoon Montili Datuk Seri Musa Haji Aman kokomoi ahal ponoihian mahik royalty tumau.
“Kosokodung zou boos di Vozoon Montili i mokianu ahal diho do pinoosan miampai tavavasi om okon ko lahan mononsog tu miampai lojik diho, zotokou (Sabah) id suang Malaysia.
“Nga hobi vinasi do onuan o layat Sabah om Sarawak kohobizanan toi poimbida tokuudi tu duuduvo pogun diti nopo nga mononokodung koiso kopohabusan petroleum pomogunan diti. Dadi au kahasa sokio nung poinsavaton iho montok kotundaan do pogun om kounalan do layat,’ ka dosido.
Ontok udizoo nung piumpongozan diho mositi poonjulon id suang timpu tosomok miaga di pinokianu do pogun ngaavi suvai, minoboos i Musliati do au kahasa nung maan iho tosisikap di aanu.
“Nga osikap toi ahaid, pohoson o koputusan di otoimo dotokou diho do i tavasi montok kavasian do layat om kopolintaan pogun om Malaysia,” ka dosido.
Ontok pokionuo mongomi batos do boogizan gugumaga montok popoinsavat pambalazan royalty tumau Sabah mantad himo piatus kumaa 20 piatus, minoboos i Musliati do iho nopo nga sinoou do gugumaga om kaanu izioho mamatos nunu noopo nga au aanu monuhuk.
“Au zou kosokodung do boogizan gugumaga nga sabaagi mogiigizon Sabah, ahansan tokou do onuan hobi mantad diho (himo piatus).
“Okon ko sabap popoimbuhai o boogizan gugumaga do ahal diti om katanud tokou…mimang id suang komponen paati Barisan Nasional (BN) om songovian layat Sabah, mimboos ahal royalty tumau do mositi poinsavaton…kivaa di popoboos atag hobi do 20 piatus, 10 piatus om susuvai po.
“Savi avi boogizan poimbibas popoboos atag nga atag diho i kosudong om “win-win situation”. Sabaagi layat Malaysia, mositi tokou nogi kikoimaan aadang miampai kopolintaan hongkod tu iso tokou id iso pomogunan. Nunu noopo asil di aanu dotokou, mositi piihangan dotokou songovian do pogun ngaavi suvai,” ka dosido.
Minoboos i Musliati do kopolintaan hongkod nga manaak nogi kopoobian di tagazo kumaa Sabah, miaga do id suang bajet, Sabah om Sarawak mimang do noonuan kopoobian di togumu montok kotundaan pogun diti.
|
