|
|
|
Azwan pinopokito do tampat id nombo mohoing kusai disido tinangaan do buazo, di Tadau Kotohu nakatahib.
|
17th August, 2012
TAWAU: Songuhun komuhakan kusai kiumul 16 toun nokotigog kahapas nokokito do mohoing kusai disido i maamaso kozo momukot udang id Bavang Udin, minonigog tinangazan do songinan buazo om ginazat kuminaa id bavang.
Id suang kinantakan di jam ko 4.30 minsosodopon di Tadau Kotohu dino, komuhakan dino, Azwan Jailani, 16, id piahatan piipio no meter mantad mohoing kusai disido, Jailani Indersaya, 54.
“Ontok timpu dino maamaso zou magapon, mohoing ku maamaso momukot. Minonigog songinan buazo oitom tuutulus minanangau di mohoing kusai ku om minamagazat dau id bavang taahom.
“Kumininam zou do minogium tumanud do vaig di gumua id tisan bavang, nga buazo dino om mohoing kusai ku tuutulus natagak id suang bavang,” ka disido do tuminongob.
Tumanud disido, au isido nokososoou do au kaanu monoimo kalamazan Hari Raya Fitri toun diti miampai mohoing kusai disido, mantad no kinantakan dino.
Huguan Pulis Uvang Tawau, ACP Ibrahim Chin i pinopointahang kinantakan dino ontok notuubungan pinopoiho do iso kalaja kopogiuman babaino pinapanau montok mogium di munggui natagak.
Kopogiuman dino tinoodo miampai do piipio agensi suvai kaampai no boogizan bomba, Rela, Koupisan Perhilitan om tuhun kampung.
“Kiis tinangaan buazo pointantu no do nantakan id uvang diti miaga di Bavang Kalumpang, bavang Serudong om Bavang Udin.”
“Saasabap no dino mamason isido mogiigizon mooi do miingat-ingat ontok mindau id bavang om mongkimamaa montok minsodu mantad uvang di noihaan kivaa mamaamasi buazo,” ka disido.
Kalaja kopogiuman di munggui babaino maamaso po kozo aadsai papanaon.
|
