|
|
|
Ingkaa nokoozuzuvo kinoumbako do bas ekspress i nokogompit suang kohigaganan i nokopogompit tohu kiniopon.
|
17th August, 2012
KINABATANGAN: Tohu susumakai nopujulan kiniopon om tohu vagu nosinduahan id suang kohigaganan talun alun popoompit iso bas ekspres id Km 121 Talun alun Sandakan-Lahad Datu poindoos Kampung Paris di koniab.
Tohu i munggui nopujulan kiniopon id tampat kinantakan dino nopo nga kusai ointutunan sabaagi do Usman Sulaiman, 26, Jabar Maidin, 54, om Piyan Ardian Shah Osman, 23.
Tohu susumakai i noindamaan nosinduahan nokotoimo pogusapan id Hamin Pongusapan Kinabatangan om kointutunan dioho au po kozo noihaan.
Huguan Pulis Uvang Kinabatangan DSP Martin Lugu minoboos kinantakan dino di kuang hobi jam ko 2.50 minsusuvab ontok bas dino minogovit do 38 susumakai miampai songuhun papanau om duvo monuhung papanau id suang pamanaan mantad Kota Kinabalu kumaa Tawau.
Ka disido tumanud luputan kopoguhu di munggui, bas dino au naanu minamagaga om nakagavad poguhui nabahik impiipio.
Sundung i do ingkaa, susumakai suvai, papanau om duvo monuhung papanau nokotoguvang nopo kosinduahan tokuudi id nombo vookon mantad dioho nousap sabaagi do mokikiusap dahabus id Hamin Pongusapan Kinabatangan om Hamin Pongusapan Lahad Datu.
Minoboos isido tinan di munggi pinaatod id Hamin Pongusapan Kinabatangan montok kapamazazakan.
Poinsuang nogi id bas dino nopo nga 31 susumikul Univositi Teknologi Mara (UiTM) Sepanggar Kota Kinabalu i id suang pamanaan mahik kampung dioho id Tawau montok monoimo kalamazan Hari Raya Aidilfitri.
Saviavi dioho nokotoguvang nopo kosinduahan tokuudi om pinopotihombus pamanaan kumaa Tawau miampai susumakai suvai i natampasi, i tinoina do komponi bas dino.
|
