|
|
|
Sapawi miampai nintangan di Latip Sharif Endra pinopotunui do suat kopomihian puu kounsol uvang Sipitang kuminaa di Datuk Jamilah Sulaiman.
|
16th August, 2012
SIPITANG: Kiginumu do sizam projik pinopoompit balanja RM1.7 lizong nopongo poimponu miampai kotuhungan polinta hongkod pinapanau do Kounsol Uvang Sipitang (MDS), ka di Puu Parlimen Sipitang Datuk Sapawi Ahmad.
Ka disido, montok projik koumohigan om kapamabangan, duvo projik nopongo poimponu om nakapagavi balanja RM250 ngoibu.
Suvai mantad dino MDS nga pinapapanau do projik pisokodungan miampai Syarikat Strength Fealty Sdn. Bhd id suang popobuu do 19 unit kedai 2 milouting.
Minoboos i Sapawi dino ontok lamai tuminau puu kounsol uvang Sipitang om mitingan poimponu koinduvo id doiti, di koniab.
Mongunsub i Sapawi mooi do hizab pakalaja id suang tinimungan om guminavo Sipitang nga mositi posunizon miampai kotuhidan om tonggungan id suang monoodo kalaja di tinaak.
Ka disido miampai kivaa hizab miaga dino pointantu no do angkab mamadadi do Sipitang kobuu om koinsavat aanu humantoi.
“Kada no kozo do kivaa di poposoguhu dioho sondii om koulalaho aiso pisokodungan… iti kaantaban kumaa pongkimamaan tokou popobuu uvang diti,” ka disido.
Id lamai dino kiginumu do 17 tuhun nopihi dumadi puu kounsol uvang Sipitang izioho nopo nga i Datuk Semion Abdul Rahim, Datuk Jamilah Sulaiman, Abdul Rahman Mohd Noh, Moktar Matussin, Rosli Tahir, Yusri Pungut, Anthony Liaw, Yeo Boun Kiat, Wong Ket Sing, Bongkol Amin, Aliddin Mohamad, Goven Jablee Lasong, Lau Kim Ling, Geaogre Libat Dakwat, Jamian Yunus, Asli Moksin om Angian Alai.
Tumanud disido, puu kounsol mositi modihin monoodo kotontuan miampai au mazaa kalaja pibaasan gisom kaanu popogompit topiumanan au songkuo asantaban om touvi no dino kopoimbuhai pitongkizadan id piahatan sondii.
“Ondomon kozo tonggungan sabaagi do puu kounsol… suvai ko ontok monuhung popobuu uvang diti, puu kounsol nga mogovit tanda polinta Barisan Nasional (BN).
“Kointutunan sabaagi puu kounsol mositi tamangan om mongkimamaa modihin mantad koimbuhai pogimbiungatan mantad layat,” ka disido.
Pinopoiho i Sapawi do puu kounsol nopo nga tuhun taatangan piahatan polinta om layat, mantad dino potitikid tonggungan di tinaak mositi todoon miampai otuhid om kitonggungan.
Ka disido potitikid haang di naanu do puu kounsol pointantu no do intangan do layat.
“Iti no saasabap puu kounsol mositi monoodo kotontuan id lahan pisokodungan, pongkimamaan monoodo kotontuan soosondi koovit tanda au avasi kumaa polinta,” ka disido.
Mongunsub i Sapawi mooi MDS popointutun moto montok mamagazat kokitanan layat, moto dino pointantu no do kapatanda hizab di popoompit saviavi boogizan kumaa potitikid puu MDS sondii.
“Onu nopo projik kotundaan mositi todoon miampai lahan nouhud om nung popoompit do kopopuvan boogizan swasta MDS mositi kivaa id suang koozuzuvo menang-menang om layat Sipitang kaanu do kovosian dino.
Pinopohombus nogi i Sapawi topiumanan ounsikou miampai nangangazan di nosuat do MDS om mokianu isido dino do poinsavaton,.
Nokotindapou nogi id lamai dino kaampai no Ponikoon MDS nogi Upisol Uvang Sipitang Latip Amat, Upisol Eksekutif Sharif Endra Bin Abdul Hamid om Upisol Kalaja MDS Daut Kassim.
|
