|
|
|
Ronald (tanga) pinapataaak sakadai kakamot sipoot di ontok abaabazan nokomoi, naamot intangan di Michael.
|
16th August, 2012
TELUPID: Pisokodungan om pilotian di togiot id tatanga do paati komponen Barisan Nasional (BN) Sabah, adadi kunsi kumaa doid kahantazan id pogun Sabah diti id pomihian tagazo mikot
Kerjasama dan persefahaman yang erat kalangan parti komponen Barisan Nasional (BN) Sabah menjadi kunci kepada kemenangan di negeri ini dalam pilihan raya umum akan datang.
Minoboos i Puu Parlimen Beluran, Datuk Ronald Kiandee do id timpu baino diti, pointahang o pilotian om pisokodungan id tatanga do paati komponen Sabah diho do maso mimang pantod.
Ka disido, factor diho popokito kotoundaan do BN montok mongohid tundoonok do paati gugumaga i kuminam mokianu sokodung mantad layat miampai papalaat do BN.
“Gontob pilotian diti nga opiumanan nogi id nazatan uvang Parlimen Beluran,” ka disido di ontok pinopohombus pason id abaabazan kinopomoiganan Pitimbungakan Pointumung Paati Pisompuuvan Sabah (PBS) Zon Wonod, i pinoimagon di Puu Hintuun Koundangan Pogun (Adun) Labuk, Datuk Seri Panglima Michael Asang id Kampung Wonod di kavavagu diti.
Ontok ponogi diho, minoboos isido do tumihombus o kopolintaan BN do manamong konasipan do layat id savi avi nazatan, hobi no doid kopotoundaan koumatan impoon om kaganapan montok mongiho kozo do layat mamaamasi miampai aandang.
Ka disido, tonggungan om ponuu di pinataak do layat kuminaa kopolintaan BN nopo nga au susuvakon montok monundun dioho, hobi no di momoguno do sakadai om poingizon id uvang habus kakadazan.
Tumanud disido, minaganu ponginsomokan o kopolintaan miampai mindau id gana montok monginsomok om mokinongou kobohingkaangan do layat om manakadai dioho do monguhan kobohingkaangan diho id konsep 1Malaysia.
Minoboos isido do piipio abaabazan, vookon dino nopo nga Sakadai Layat 1Malaysia (BR1M), Teksi Layat 1Malaysia om Kadai Layat 1Malaysia, sabaagi haang di nanu do kopolintaan montok monginggaan simbagat do layat.
Mantad diho ka disido, hobi ahansan o layat montok tumihombus monokodung do BN tu likood kopolintaan di avasi kinahantazan doid pogovitan kosimbanon om koubasanan di igitan montok manamong do layat.
“Layat id habus kakadazan do baino, koiho mombii buuan di koimau mogovit kosimbanon di tagazo, pibagahon do buuan paati gugumaga i koiho noopo mimboos aiso suang popohivos pinggisoman do kopolintaan montok kounalan sondii om kuasa,” ka di Ronald.
|
