|
13th August, 2012
KOTA KINABALU: Pinapatatap o Komontilian Pidagangan Suang Pogun om Kopomogunaan, do gatang tamangan montok 20 kavo bakaang id Sabah, tuminimpuun di koniab gisom ko 26tv Kavahu diti, id siibo Skim Panamangan Gatang Timpu Panaandakan Hari Raya Puasa 2012.
Minoboos i Potunud Upis KPDNKK Sabah, Noor Alam Khan Abd Wahid Khan do gatang tamangan diho nopo nga tumimpuun sominggu poguhui kalamazan Hari Raya, sangadau ontok kalamazan om tuu tadau ahapas kalamazan id savi avi 24 uvang id pototongkop Sabah.
Minoboos isido do pinaanjul o skim diti mooi o momoomoguno ngaavi kavasa kaanu bakaang kagaganapan timpu panaandakan id gatang di apatut om manahom mantad koinsavaton gatang di oindamaan.
Ka disido, bakaang gatang di tamangan mnotok Skim Tamangan Gatang Timpu Panaandakan hari Raya nopo nga Manuk Poimpasi RM5.90 sokilogram montok gatang pamajakan om RM6.60 sokilogram montok gatang runcit, Mamuk Standard RM8.60 (borong), RM9.60 (runcit) sokilogram om Manuk Super RM8.80 (borong), RM9.80 (runcit) sokilogram.
“Daging sapi kinoizonon RM16 (borong), RM18 (runcit) sokilogram, Daging Kalabau Kinoizonon (RM17 (borong), RM20 (runcit) sokilogram, Daging Kalabau Nudal (India) RM11.50 (borong), RM12.50 (runcit) sokilogram, Tontohu Manuk Gred A, B om C nopo nga tososondii 38 sen, 37 sen om 36 sen montok gatang borong om 40 sen, 39 sen om 38 sen songinan montok gatang runcit.
“Montok kinotuan kubis tobindugu nudal nopo nga RM3 (borong), RM3.50 (runcit) sokilogram, habo taagang RM8 (borong), RM10 (runcit) sokilogram om Tumatus RM3 (borong) om RM14 (runcit ) sokilogram om gatang borong sokilogram montok piasau (songinan) nopo nga RM1.40 sokilogram om Piasau Nokingkin nopo nga RM4 id runcit,” ka disido.
Noboos disido iti kuminaa doid magaganu abal di kahapas minombii bakaang tamangan om pinopotimpuun Skim Pintamgangan Gatang Timpu Panaandakan Hari Raya, id Pasal Tagazo do doiti di koniab.
Minoboos i Noor Alam do kasang tana nudal, bavang taagang tonini (India), bavang tagazo nudal, bavang topuak (China), bogoi kentang nudal (China) om sada kembung nga pinovihiu nogi id siibo Skim Tamangan Gantang Timpu Panaandakan.
“Pavasaon o mongingindapu dumagang bakaan gatang tamangan tumanud gatang maksimum i pinatantu do kopolintaan om popovihiu tanda gatang omuhok aagang doid bakaang gatang tamaganan montok popisuvai dino miampai bakaang do suvai.
“Poingkuo po, unsubon nogi o mongingindapu montok papadagang bakaan diho do hobi siniibo mantad gatang maksimum sokio nung gatang di aanu do hobi siniibo.
“Suvai diho, mositi nogi o mongingindapu do mongiho kozo koonuan bakaang do kavanga id pasalan om nogi momoguno kakamot ponimbang om ponuku di pinavasa,” ka disido.
Pinoposoou nogi i Noor Alam doid mongingindapu ngaavi do onuon o haang tokodou kumaa dioho di au mimozo koatulan id siibo do skim nokomoi.
“Nonomboo mongingindapu (tososonguhun) di koimang kahasaan id siibo Akta Panamangan Gatang om AntiPencatutan 2011, kavasa ontokon danda au katahib RM100,000 toi tolungku au katahib tohu vuhan toi duuduvo diho do koontok toi ontokon kompaun gisom RM50,000 montok kahasaan koinsan.
“Montok kahasaan koinduvo om sumusuut dino, songuhun mongingindapu kavas dandaon au katagib RM250,000 toi tolungku au katahib himo toun toi duuduvo diho do koontok,” ka disido.
Minoboos i Noor Alam do komponi di koimang kahasaan diho nopo nga kavas an dandaon au katahib RM500,000 tou ontokon kompaun gisom RM250,00 montok kahasaan koinsan om danda au katahib RM1 lizong montok kahasaan koinduvo om sumusuut.
Ka disido, izioho au nakaanu pinopovihiu tanda gatang votik aagang tomuhok nopo nga kavasa dandaon gisom RM10,000 toi ontokon kompaun gisom RM5,000 om komponi di au nakaanu miminang diho nopo nga kavasa dandaon do RM20,000 toi kompaun gisom RM10,000.
“Doiho id hivang ngaavi di nadadi gondoon tuhun ginumuan o Upisol Kokuasaan om Upisol Monoihi Gatang do KPDNKK, miaga id pasal tuhun ginumuan, pasal doungosuab om pasar tani do tikid tadau montok papapanau pomolisaan om ponoihian.
“Kituduvan o ponoihian diho montok mongumohig do momoomoguno mantad ontokod gatang takavas mantad mongingindapu di aiso etika songian timpu panaandakan,” ka disido.
Minoboos i Noor Alan do momoomoguno di koiho do kivaa mongingindapu popoinsavat gatang bakaang di poinsuang id skim tamangan gatang, nopo nga kavasa monoodo sogku id numbul 088-484500, toi id talian bebas tol 1-800-886-800 toi sms kumaa 1588 miampai manaip “KPDNKK ADUAN toi monoodo luputan id nonomboo upis laan KPDNKK id pototongkop Sabah.
|
