|
|
|
POPOTUNUI TITAAK… Musa (koduvo vanan) maso papataak sakadai kuminaa doid songuhun mantad mononoimo ontok abaabazan nokomoi id Mosogit Taman Fajar di koniab.
|
13th August, 2012
SANDAKAN: Potihombuson o pionitan di tavakas id piahatan do Kopolintaan Pisompuuvan om Kopolintaan Pogun montok kounalan do Sabah om layat id pogun diti.
“Kopolintaan Pisompuuvan id siibo pomuu’anan di Huguan Montili, Datuk Seri Najib Tun Razak diho nopo nga koiho pokionuan do layat Sabah,” ka di Vozoon Montili, Datuk Seri Musa Haji Aman di ontok abaabazan kapataakan sakadai kuminaa doid mononoimo id Abaabazan Sejambak Kasih om Sumbangan Bersepadau Ramadhan, id Mosogit Taman Fajar do doiti di koniab.
Sabah nopo nga pogun di koduvo tagazo no kozo id pomogunan Malaysia diti om lizongan Ringgit pinoobi do Kopolintaan Pisompuuvan montok ponoodo infrastruktur, papaanjul abaabazan kotundaan om nogi manaak sakadai kumaa doid layat, ka di Musa, isido ponogi i Huguan Boogizan Umno Libaran, om nogi Montili Kousinan Sabah.
Ka disido, pionitan talun alun di tavasi id Sandakan nga notoodo montok kouhanan om kaandangan kumaa doid layat doiti. Mohoing ngaavi nga au nodii tagal papaatod do tanak ngaavi dioho montok mongoput balajalan id sodu tu Hongkod Balajalan id Sungai Batang nga popoizon do institiut ponginobosan takavas.
“Ogumu o projik di pinaanjul do kopolintaan Barisan Nasional (BN) id Sabah montok kounalan do layat id pogun diti,” ka disido.
Naamot diho, pinopoiho i Musa doid layat mooi do au otumbazaan totondos di aiso sunsud di maan do boogizan aiso tonggungan i popoboos do aiso nuununu notoodon do BN montok manakadai do layat.
“Zioho (boogizan di aiso tonggungan) nopo ngaavi diti nga koiho noopo papatazad vudut om popohivos do layat,” ka Musa.
Potindapou nogi doid abaabazan diho i Puu Parlimen Libaran, i ponogi Kumoduvo Huguan Boogizan Umno Libaran, Datuk Juslie KK Ajirol, Puu Hintuun Koundangan Pogun (Adun Gum-Gum) Datuk Zakaria Mohd Edris, Huguan Tinimungan Koonduan Umno Sabah, Datuk Armani Haji Mahiruddin om buuan ngaavi mogiigizon posoihi.
|
