|
12th August, 2012
KOTA KINABALU: Somok saviavi koupisan om agensi Hongkod kopoguhu id Sabah babaino hinuguan do pakalaja polinta id tinimungan tanak kinoizonon id pogun diti, ka di Huguan Monunuat Pogun Datuk Seri Dr Ali Hamsa.
Minoboos isido iti kaampai no Koupisan Kohidasan Pogun Sabah, Koupisan Kastam, Koupisan Imigresen om Koupisan Balajalan.
Ka disido polinta hongkod tomoimo manaak kosivatan kumaa tanak kinoizonon montok momohuguan koupisan om agensi Hongkod id pogun diti miaga di pihahansan do layat Sabah.
“Ogumu vagu koupisan om agensi Hongkod suvai id Sabah i pobuuon do tanak kinoizonon, mantad dino ahal diti au koimbuhai (kokomoi tanak kinoizonon poingisanon),” ka disido kuminaa magaganu abal kahapas tuminombuhui Hamin Pongusapan Queen Elizabeth 1, somok doiti totuvong koniab.
Minoboos i Ali dino ontok pinokianu monugut kointahangan potihombus gugumaga id Sabah i mokianu mooi hobi ginumu pakalaja polinta kinoizonon mantad Sabah pihion sabaagi huguan koupisan om agensi hongkod id pogun diti kopitanud miampai konsep ‘Borneoisation’ i nopiokunan ontok kinoponuidangan gagasan Malaysia.
Kokomoi kalaja kapanadaan louting kavavagu Hamin Pongusapan Queen Elizabeth 1, minoboos i Ali asantaban ginavo disido miampai kinavas nangangazan projik dino om humansan dino aanu momongo tumanud timpu..
Ka disido polinta Hongkod mazaa komontilian dino i tomoimo popohuzung sakadai di gunoon montok papantod vagu kouhanan id hamin pongusapan dino montok kovosian saviavi.
Nokosoguhu dino, ontok minamason id lamai mongukab puasa miampai pakalaja polinta id Dewan Togumu Guno Kompleks Kotoinaan Hongkod id Likas somok doiti, minoboos i Ali vookon ikoton kotoinaan di pounsubon disido nopo nga papalayat kotoinaan polinta.
Minoboos isido koinsamakan miaga dino kiguno montok popoinsavat kointutunan kotoinaan polinta id mato layat.
Minokianu i Ali pakalaja polinta mooi misingubas koubasanan mindau sondii, kongingia om osuau layat.
Humansan nogi isido mooi saviavi huguan koupisan kaanu mongintong kokomoi kotundunan pakalaja hoohobi no kozo id suang ahal koinsavatan pangkat montok dioho i ahaid no pakalaja id suang iso koupisan toi ko agensi hongkod.
|
