|
10th August, 2012
KOTA KINABALU: Layat id pogun diti unsubon mooi do au poponini kotumbazaan Suruhanjaya Koponoizukan Diraja (RCI) i tinuidong montok monoizuk ahal modiidikot aiso kasagaan id Sabah.
Montili Kotombuhuzan, Koubasanan om Sandad Posoihi Sabah Datuk Masidi Manjun minoboos layat apatut dino manaak kosivatan kumaa RCI monoodo tonggungan dino.
“... nung au, kopokionuan dotokou montok RCI diti adadi pongkimamaan di momiubat,” ka disido kuminaa magaganu abal kahapas tuminindapou do lamai mongukab puasa komontilian disido, id doiti songkoniab.
Pinokianu isido monugut kointahangan bagas Huguan Montili Tun Dr Mahathri Mohamaad songkoniab, i vookon suvai papataan koinsavatan ginumu modiidikot aiso kasagaan id Sabah om tinimungan dino kipotutan toimoon sabaagi do momogun tu nokoizon no ngapadan toun id Malaysia om kaanu moboos id suang boos Malazu.
Tadau Kohimo nakatahib, Huguan Montili Datuk Seri Najib Tun Razan nosogu minoboos do popoboos isido kopoguhudan RCI songian tumombuhui id Sabah kohimpupuson minggu diti.
Minonugut poingonop, minoboos i Masidi mogiigizon kinoizonon au asanangan ginavo miampai koinsavatan mogiigizon id Sabah tu “kototongob piagahon pogun suvai.”
Tumanud sisimba id Parlimen toun nakatahib, mogiigizon Sabah i kiginumu do 651,304 ontok 1970 nokoinsavat kumaa 929,299 sedekad kahapas dino. Sundung i doi ngkaa montok timpu duvo dekad kahapas dino, ginumu mogiigizon Sabah nokoinsavat id lahan okito kozo kumaa 1.5 lizong om nosuat ontok 2,468,246 tuhun koikatan 2000.
Pinopointahang nogi i Masidi do aiso lahan tosikap id suang koonuan ningkokoton koponompogunan om sakadai undang-undang mositi tonudon poimponu dino ontok potitikid timpu.
“Otumbazaan zou kalalahano pongintangan RCI popoompit lahan monguhan ahal dino hoohobi nokozo kokomoi totondos koponompogunan di kototongob. Nung sosonguhun dino kipotutan sabaagi do layat, toimoon dotokou. Iti okon ko iso di poinsusuvai di Sabah,” ka disido.
|
