|
|
|
KOSILOWOTON KARAJA....Okito dilo i Yahya ontok suminolowot di tongo asil pinamansaiyan talun-alun nokomoi miampai di pipiro lalansanon mogigiyon suai.
|
9th August, 2012
PUTATAN: Koinsanai tongo kontraktor i popoindalan karaja koonuridangan walai doid Kampung Ketiau om Serigai, dodoros hiti napason do amu momoguno padsakaiyan tawagat montok momirangkat di tongo kagaganapan momowonsoi linimput.
I Kumoduo Luguan Montiri, Datuk Seri Yahya Hussin minoboros do ingga guno nung prujik i anu do pongohon pipiro tulan taawal nga nokopokito no o kobolingkahangan kumaa id talun-alun kampung dilo.
Pinapasala i Yahya di tongo padsakaiyan tangaagat dilo ngawi i momoguno talun-alun dilo sabaagi wokon mantad sabap kumoiso id sabalik koyuon talun-alun kampung dilo.
“Mamason oku kumaa di tongo kontraktor ngawi do momoguno luri di lobi okoro soira momirangkat kagaganapan diolo sabap nung haro talun-alun id koyuon miagal dilo sundung pia tu katalib do pipiro nogi tulan kinopongohan nga totopot iso korugian kumaa dati,” ka disio.
Minoboros isio dilo kumaa media ontok suminolowot id talun-alun kampung i nokoingkawas gontob doid duo kampung nokomoi di konihab.
Kos nopo karaja koponorinaan doid ralan Lorong Kampung Ketiau dilo nga kigatang RM80,000.
Naamot, prujik mongingkawas gontob ralan sumuang Kampung serigai kigatang RM43 Ribu, pongingkawason gontob ralan gravel kuminaa talon-alun Premix Kampung Serigai Fasa I om Fasa II sompopori kigatang RM55 Ribu om RM50 Ribu.
Suai mantad dilo, suminolowot po nogi i Yahya kotorinaan Jalan Lorong Kampung Ketiau i kigatang RM80 Ribu om koponuridangan walai wagu kigatang RM50 Ribu id siriba Ababayan Koponguhupan Walai (PBR) montok songulun bagas pakakaraja tulun nokoiyonon, i Matahar Robin.
Tumanud di Yahya, kosudong i Matahar montok minongupalai koponguhupan nokomoi om minongunsub mogigiyon suai i poingiyon id walai id noromuk toi ko amu songkuro kosonong montok mongupalai koponguhupan miagal dilo.
Minamatos po nogi isio do lobi ogumu prujik kaanu o pohoroon id timpu dumontol doid duo kampung.
Id suang kosilowoton dilo, Yahya i po nogi Puru Lintuhun Koundangan Pogun (Adun) Petagas tinanud dio Monunurat Pulitik disio i Mahlan Zinin, Upisor Watas Putatan, i Ag. Abd.Ghani Pg.Yusoff, Mongingigit Karaja Naamot Lalansanon Komgoton Rayat (PKR) Petagas, Ali Hussin Sharin om pipiro po lalansanon mogigiyon nokoiyonon.
|
