|
8th August, 2012
KLANG: Susumakit kitoluo huhunsou tavak kronik i kopogompit do tinimungan pakakalaja, pinopokito kinoinsavaton id piahatan do 18 om 20 piatus tikid toun, ka di Montili Ontodonon Tuhun, Datuk Seri Dr S. Subramaniam.
Minoboos isido do kinoinsavaton diho nopo nga tumanud pinonundunan do Kotinanan Koumohigan Sosial (Perkeso) i minambalanja do RM92.5 lizong kouhanan sakadai pongusapan dialysis kumaa doid tuhun kivaa insulon Perkeso di toun nakatahib, pibagahon do RM77.2 lizong di 2010.
“Ginumu diti nokoinsavat 18.8 piatus. Gisom di vuhan Koonom toun diti noopo, pinapahabus o Perkeso do RM43.5 lizong montok monundun kos pongusapan dialysis,” ka disido doid kopoihaan media di kahapas pinapataak cek sakadai pongusapan dialysis montok tuhun kivaa insulon Perkeso om pinapaanjul kotombuhuzan id Hongkod Hemodialisis St. John Abmulans Klang, do doiti di koniab.
Potindapou nogi diho i momolinta pogun St. John Ambulans Malaysia (SJAM) Selangor, Datuk Yeo Kim Thong, i ponogi Huguan Upisol Kalaja SJAM-Uvang Pantai Selangor (KPS) om i Poniikon Perkeso Datuk Abu Huraira Abu Yazid.
Mantad diho, minoboos i Subramaniam do mosito o boogizan kogompit mogium lahan tavasi kozo montok mongingkudi ginumu pakakalaja kakandai toluo huhunsou tavak om mongunsub dioho mantad kodimpot id gontob kronik toi oindamaan.
Ka disido, toluo oomis sobu nung uhanon hobi piniodo mantad timpuun nopo nga kaanu mongivad dino koohiu do huhunsou tavak sundung tu susumakit dino nakakandai no toluo nokomoi sohinaid 20 toun.
“Nung au tamangan, id suang timpu piahatan tohu kumaa onom toun, hahaid po, kaanu kotoguvang o susumakit oomis sobu do koumbakan huhunsou tavak. Sabap diho, kopipiumanai om pongia’an nopo nga koguno kozo montok mongiho kozo do susumakit au koikot id gontob ‘End Stage Renal failure’ (ESRF),” ka disido.
Kokomoi sakadai pononduhian dialysis mantad Perkeso, minoboos i Subramaniam do popotounda o kotinanan diho do sakadai pononduhian dialysis kumaa doid tuhun di kivaa insulon i nokotoguvang toluo huhunsou tavak kronik id pangan ESRF.
Gisom di vuhan Koonom nakatahib, pinopoiho isido do pinapahantoi o Perkeso do 6,788 upalai mantad mononoimo pinsin ‘ilat’ om okom ilat mantad po di pointutuno o kouhanan diho di 1999 montok popouhan dioho do monoguvang pongusapan dialysis.
Soginumu 366 hongkod pongusapan dialysis nanu sabaagi panel dialysis Perkeso id pototongkop Malaysia.
Suvai diho, minoboos nogi isido do popotounda nogi o Perkeso do sakadai montok lahan pongusapan Continuous Ambulatory Peritoneal Dialisyas (CAPD) toi lahan momohiung zaa maza hapau tizan suvai ko popotounda sakadai subsidi totobok erythropoietin (EPO) montok manakadai do tuhun kivaa insulon monundun kos totobok nokomoi.
Ka disido, montok pongusapan CAPD, onuan o susumakit do tonggungan kiikila RM2,500 tikid vuhan, naamot do totobok EPO subsidi nopo nga RM30 tikid totobok montok induvo sominggu pataakon kumaa doid tuhun kivaa insulon i momoguno totobok diti.
“Kouhanan kavavagu i pinotounda tuminimpuun di vuhan Koiso toun nakatahib nopo nga kouhanan subsidi pomohi tubat Immunosuppressant (Anti Rejection).
Subsidi di pinotoundan nopo nga sakadai kousinan montok pomohi tubat miampai ginumu maksimum RM1,560 sombuhan,” ka disido.
|
